لاس رسیدونکی لینک

Breaking News

کرونا وایرس د پاکستان او نورې نړۍ د عیسایانو ایسټر یا اختر هم اغېزمن کړی


واشنګټن ــــ په پاکستان او نوره نړۍ کې عیسایان سږ کال په داسې وخت کې خپله مذهبي خوشالي ایسټر یا اختر په سادګۍ سره لمانځي، چې د بیت المقدس په ګډون په امریکا او نوره نړۍ کې اکثره کلیساګانې بندې دي.

د اپرېل ۱۲مه په ټوله نړۍ کې د عیسایانو د مذهبي تهوار ایسټر ورځ وي چې په ډېر جشن سره لمانځل کېږي خو سږ کال د کرونا وایرس له کبله دا ورځ په سادګۍ لمانځل کېږي او عیسایان کلیساګانو ته د مذهبي مراسمو لپاره نه شي تلای.

په پاکستان کې مېشت عیسایان چې اکثره یې په ښاروالیو یا میونسیپلټیو کې د خاکروب دندې لري، وایي د کرونا وایرس له کبله په ټولبند (لاک ډاون) کې دوی هم زیات اغېزمن شوي ځکه چې وایي په داسې وخت کې یې روزګارونه و درېدل چې ایسټر یې په را رسېدو وو.

عامر ګیل په اسلام اباد کې مېشت یو عیسایي دی چې هلته په یوه کور کې د صفایي کار کوي، هغه وایي د کرونا وایرس له خپرېدو سره د کور خاوند له خبرداري پرته له کاره و ایست. ګیل له رایټرز خبري ایجنسۍ سره په مرکه کې ویلي:

"موږ ته په عامو حالاتو کې هم څوک نه را نیژدې کېدل او اوس خو د کرونا وایرس له کبله شتمن خلک فکر کوي هسې نه [موږ] غریبان دا وایرس د هغوی کورونو ته وروړو".

له عامر ګیل پرته په پاکستان کې د نورو مزدورکاره خلکو غوندې ګڼ شمېر هغه عیسایان هم بې روزګاره شوي چې ورځنۍ مزدوري یې کوله. دغه عیسایان وایي په داسې وخت کې یې کارونه په ټپه و درېدل چې مذهبي خوشالي یې را رسېدلې وه او بچیو یې د ایسټر لپاره نوې جامې ځنې غوښتې. ګیل وايي:

"بچي مې د ایسټر لپاره د نویو جامو او پېزارو غوښتنه رانه کوي خو زه هغوی ته وایم چې سږ کال زموږ ایسټر نه شته".

عیسایان د پاکستان د ابادۍ دوه فیصده برخه دي چې اکثر یې په ښارونو کې د خاکروب، د صفایي د کارکوونکو او په بازارونو کې د جارو وهونکو په توګه کار کوي او په وړو وړو کورونو کې ژوند کوي.

کرونا وایرس د مسلمانانو د مقدسو ځایونو مکې او مدینې غوندې د عیسایانو مذهبي عبادتخانې هم بندې کړې دي چې له کبله یې سږ کال د ایسټر مراسم پکې د نورو کلونو غوندې نه تر سره کېږي.

د پاکستان تحریک انصاف حکومت په هېواد کې د کرونا وایریس له کبله په لاک ډاون کې بې روزګاره شویو کسانو ته د ۱۴۴ اربه روپیو د مرستې فنډ اعلان کړی چې یوې کورنې ته ۱۲ زره روپۍ ورکوي.‌ پاکستاني عیسایان وایي، هیله من دي چې دوی ته به هم حکومت دغه مرسته ورکړي.

ځانګړې ویډیوګانې

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:57 0:00

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:58 0:00

Recommended

XS
SM
MD
LG