واشنګټن ــــ امریکې له پاکستان سره د همکارۍ په خاطر د کرونا وایرس د مخنیوي د مبارزې په لړ کې د خپلې پرمختیایي ادارې یوسېډ له لارې اسلام اباد ته نور 100 وینټیلېټرز یا د ساه اخیستلو مشینونه ورکړي دي.
پاکستان یو له هغو هېوادونو دی چې ډاکټران پکې د کرونا وایرس د مخنیوي په مبارزه کې د نورو طبي وسایلو د کموالي تر څنګ د ساه اخیستلو د مشینونو د نشتوالي شکایت هم کوي، چې وایي له کبله یې د لوی عمر ناروغان- چې سالنډي لري- په روغتونونو کې ساه ورکوي.
په اسلام اباد کې د امریکې سفارت نن پر خپله ویبپاڼه په یو بیان کې ویلي، چې دغه وینټیلېټرز د جولای پر 28مه اسلام اباد ته رسېدلي او هلته د آفتونو مرکزي ادارې (این ډي ایم اې) ته سپارل شوي، چې په ټول پاکستان کې به روغتونونو ته ولېږل شي.
په بیان کې ویل شوي چې د کرونا وایرس د ناروغانو لپاره د ساه اخیستلو دغه مشینونه له وزیراعظم عمران خان سره د ولسمشر ډانلډ ټرمپ د ژمنې په بنیاد له پاکستان سره د ملګرتیا په خاطر ورکړل شوي دي.
دا دویم ځل دی چې امریکا په یوه میاشت کې له پاکستان سره طبي مرسته کوي، تر دې وړاندې یې هم د جولای پر درېیمه نېټه 100 نور وینټیلېټرز اسلام اباد ته ورکړي وو، چې د خبر له مخې د پاکستان په ټولو صوبو کې روغتونونو ته ورکړل شوي او کار ځنې اخیستل کېږي.
په اسلام اباد کې د امریکې سفیر پال ډبلیو جونز وایي "امریکا د پاکستان د حکومت یوه ویاړلې ملګرې ده چې د دې مرګونې وبا په مخنیوي کې ورسره مرسته وکړي او دغه د ساه اخیستلو مشینونه به په دې مبارزه کې کار ورکړي".
دغه وینټیلېټرز د هغو ناروغانو د کمې سالنډۍ د علاج لپاره هم کارول کېدای شي چې ناروغي ډېره نه وي شدیده شوې او زیاتې پاملرنې ته یې اړتیا نه وي او د دې تر څنګ له کرونا وایرس پرته هم د سالنډۍ په نورو ناروغیو لکه سکاروي او د سږو په اوږدمهاله ناروغي کې هم مرسته کوي.
د امریکې د سفارت په بیان کې ویل شوي چې د دوی د پرمختیایي ادارې یو ایس ای ډي په مالي بودیجه به د پاکستان د قدرتي آفتونو د مخنیوي له مرکزي ادارې (این ډي ایم اې) او د روغتیا له مرکزي او صوبایي وزارتونو سره په ګډه یو روزنیز پروګرام ترتیب شوی چې وایي له لارې به یې پاکستان د دې وړ شي چې د کرونا وایرس او د سالنډۍ د نورو ناروغیو مخه ونیسي.
په بیان کې ویل شوي چې په طبي برخه کې د امریکې اوږدې همکارۍ پاکستان د دې جوګه کړی چې د کرونا وایرس د ټیسټونو، د دې ناروغۍ د څارنې، د کېسونو د کشفولو، مخنیوي او د ناروغانو د علاج په برخه کې یې پرمختګ کړی دی.
امریکې تر دې مهاله د کرونا وایرس د مخنیوي لپاره له پاکستان سره تر 28 میلینه (دوه کروړه اتیا لکه) زیاته امریکایي ډالرو مرسته کړې او وایي چې دا مرسته به یې پر مخ هم روانه وي.
د پاکستان حکومت تېر ځل د امریکې د طبي مرستې مننه کړې وه خو د دې تازه مرستو په اړه یې په رسمي توګه لا څه نه دي ویلي.
