واشنګټن ــــ له پاکستان او ترکي وروسته ایران هم له اسرایلو سره د متحده عربي اماراتو پر سفارتي تړون اندېښنه څرګنده کړې ، دا یې د دې خلیجي هېواد "لویه غلطي" بللې او دا یې له فلسطینیانو سره خیانت او غداري بللې ده.
د ایران صدر حسن روحاني د جمعې په ورځ په یوه ټیلیویژني وینا کې عرب اماراتو ته خبرداری ورکړی چې که اسرایلو ته په سیمه کې د پښې ایښودلو ځای ورکړي دا به یې تاریخي غلطي وي.
د صدر روحاني تر څنګ د ایران پاسداران انقلاب ځواک هم د عرب اماراتو دا اقدام "له شرمه ډک" او "ناوړه" بللی او وایي له اسرایلو سره دا تړون د امریکې تر اغېز لاندې شوی او دا به یو اې اي ته ښې نتیجې ونه لري.
د اسرایلو او متحده عرب اماراتو تر منځ سفارتي تړون د امریکې په منځګړتوب شوی چې ولسمشر ډانلډ ټرمپ یې د تېرې پنجشنبې- زیارت په ورځ اعلان وکړ، چې د رایټرز خبري ایجنسۍ په وینا دې تړون ته د ایران د مخالفت د پیاوړي کولو په نظر کتل کېږي.
د ایران صدر روحاني ویلي، په امریکا کې د دې تړون له اعلانولو د دې خبرې باوري کول ښکاري چې ولسمشر ټرمپ به په نومبر کې د امریکې د ولسمشرۍ د یو بل پړاو انتخابات هم وګټي:
"که دا ناسم تړون نه وي نو ولې اوس او په یوه بل درېیم هېواد امریکا کې اعلان شو؟ د دې لپاره چې د واشنګټن دا ښاغلی [ټرمپ] ووټونه وګټي، ته [عرب امارات] له خپل هېواد، له خپلو خلکو، مسلمانانو او عربي نړۍ سره خیات کوې؟".
تر اوسه ترکي، پاکستان او د فلسطین خلکو د اسرایلو او متحده عرب اماراتو تر منځ د سفارتي تړون مخالفت کړی دی، خو مصر او بحرین د دې تړون هرکلی کړی دی.
متحده عربي امارات لومړی خلیجي او له اردن او مصر وروسته درېیم عرب هېواد دی چې له اسرایلو سره یې د اړیکو د عادي کېدو لپاره سفارتي تړون کړی چې د دواړو ملکونو تر منځ به د پروازونو، سرمایه کارۍ، سیلګرۍ، روغتیا، خېرښېګړې او کلچر په برخه کې لوظنامې لاسلیک کېږي.
