واشنګټن ـــ په داسې حال کې چې ټاکل شوې د بین الافغاني خبرو تر پیلېدو مخکې افغان حکومت خپل مرکچي پلاوی قطر ته ولېږي، د طالب بندیانو 200 تنه یې نور هم خوشي کړي او تمه څرګندېږي چې پاته یو سل شل بندیان به هم ژر خوشي کړي.
ولسمشر غني پرون په کابل کې د سولې له مرچکي پلاوي سره په غونډه کې ویلي "دولت د سولې پروسه کې خپلې ټولې هغه ژمنتیاوې چې نړیوالې ټولنې یې هیله لرله عملي کړي. د طالب زندانیانو ازادول سولې ته د دولت د ژمنتیا څرګند ثبوت دی".
دوو افغان چارواکو د شورو- چارشنبې په ورځ وویل چې د کابل له مرکزي زندان پلچرخي او د کندهار له زندانه یو شمېر طالبان خوشي شوي، بل لور ته طالبانو هم له ځان سره ساتلي د افغان کمانډو ځواک شپږ تنه خوشي کړي دي.
د ولسمشر اشرف غني ویاند صدیق صدیقي د طالب بندیانو د خوشي کېدو خبره تایید کړې خو شمېر یې نه دی یاد کړی. نوموړي ویلي د بندیانو د تبادلې کار لا هم روان دی، خو وایي د تبادلې پروسه دوه اړخیزه ده:
"د سولې پروسه کې د دولت ژمنې د سولې مشورتي لویې جرګې د پرېکړو په رڼا کې ترسره کېږي. موږ منتظر یو چې طالبان د افغانستان اسلامي جمهوري دولت د اسیرانو د خوشي کولو په اړه خپلې ژمنې بشپړې کړي".
طالبانو د خپلو بندیانو د خوشي کېدو شمېر نه دی ویلی، خو د دې ډلې ویاند ذبیح الله مجاهد په یوه بیان کې د بندیانو خوشي کېدل تایید کړي او وایي دا کار باید پخوا لا شوی وای. نوموړي ویلي په پلچرخي، بګرام، کندهار او نورو ولایتونو کې د پاته څلور سوه بندیانو د خوشي کېدو بهیر پیل شوی او لوی شمېر یې خوشي شوي دي:
"هیله من یو چې د [بندیانو د خوشي کېدو] بهیر به په راتلونکو دوو ورځو کې بشپړ شي".
که څه هم افغان حکومت طالبان ملامتوي چې وایي د بین الافغاني خبرو ځنډ ته پلمې لټوي خو طالبان بیا افغان حکومت ګرم بولي چې وایي د بندیانو خوشي کولو په مخ کې خنډ جوړوي او خبرې یې شپږ میاشتې وځنډولې. ذبیح الله مجاهد لیکلي:
"له تړون سره سم کله چې هم د بندیانو د خوشي کېدو بهیر بشپړ شي موږ تیار یو چې سمدستي بین الافغاني غونډې پیل کړو".
که څه هم د بین الافغاني خبرو کره نېټه او د خبرو ایجنډه لا نه ده څرګنده خو افغان حکومت ټینګار کوي چې په پیل کې به طالبان په افغانستان کې دایمي ډزبندۍ ته تیار کړي. د ارګ ټویټر پاڼې له مخې ولسمشر غني پرون بیا په دې اړه ویلي:
" د افغانستان د خلکو هیله دا ده چې د سولې په مذاکراتو کې د تاوتریخوالي پر کموالي او دایمي اوربند توافق وشي، تر څو ژر تر ژره تلپاتې او باعزته سولې ته چې زموږ د ټولو هیوادوالو هیله ده ورسېږو".
ولسمشر غني او د ملي روغې جوړې د شورا مشر ډاکټر عبدالله عبدالله پرون په کابل کې د سولې له 21 کسیز مرکچي پلاوي سره لیدلي او ویل کېږي چې دغه پلاوی به نن له طالبانو سره د خبرو لپاره دوحې ته سفر وکړي، خو طالبانو لا په دې اړه څه نه دي ویلي.
