واشنګټن ــــ د روانې ستمبر میاشتې په پای کې د روس په جنوب کې شپږ ورځني پوځي مشقونه کېږي چې د روس په ګډون د چین، پاکستان، ایران، ارمېنیا، بېلاروس، میانمار (برما) او ځینو نورو هېوادونو پوځونه به پکې ګډون کوي.
د پاکستان د بهرنیو چارو وزیر شاه محمود قرېشي تر دغو پوځي مشقونو مخکې دا مهال د شانګهای د همکارۍ سازمان (ایس سي او) په دوه ورځنۍ غونډه کې د ګډون لپاره ماسکو ته تللی دی.
د چین د دفاع وزارت د پنجشنبې- زیارت په ورځ په یوه بیان کې ویلي، دا مشقونه د چین او روس د اړیکو لپاره ځانګړې معنا لري او وایي د دغو مشقونو ځای ته به د چین په نوې ټرانسپورټي الوتکه کې پوځي موټر او سپکه وسله وروړل کېږي:
"دا مشقونه به د ستمبر له 21مې تر 26مې پورې وي چې پکې به دفاعي تدبیرونو، محاصرې او د جګړې په ډګر کې کنټرول او کمانډ ته توجه کېږي".
د پاکستان او روس تر منځ په وروستیو کلونو کې سیاسي، سفارتي او پوځي اړیکې فعالې شوې دي، چې د څېړونکو په وینا د چین د نیژدې ملګرتیا په خاطر دا هېواد اوس روس ته هم نیژدې کېږي. د پاکستان د دفاعي چارو څېړونکې عایشه صدیقه وایي:
"اوس خو په ظاهره له کرونا وبا وروسته د اقتصادي مرستې لپاره چین د پاکستان یواځینۍ اسره ده، څومره چې د امریکې، هند او سعودي عرب اتحاد ټینګېږي، همدومره پاکستان له امریکې لرې کېږي او د چین، روس او ایران ممکنه اتحاد ته ور نیژدې کېږي".
څېړونکي وایي که څه هم د پخواني شوروي اتحاد په ضد پاکستان د افغانستان جهادي ډلو ته پخپله خاوره کې ځای ورکړی وو او د هغوی ملاتړ یې کاوه، خو په وروستیو کې یې د خپلو دفاعي او سټرېټیجیکو ګټو لپاره له روس سره خپلې اړیکې بیرته جوړې کړې دي.
د اسوشیېټیډ خبري ایجنسۍ په وینا د چین او روس تر منځ له دوو لسیزو راهیسې "پرخې سټرېټیجکې ملګرتیا" د امریکې د مخنیوي لپاره تر خپل منځ په پوځي او سفارتي برخه کې همکاري لا زیاته کړې ده.
وایي د روس او چین پوځونه په وروستیو کلونو کې نه یواځې هر وخت ګډ پوځي مشقونه کوي بلکې د شام او شمالي کورنیا د شخړو پر سر په ملګرو ملتونو کې د امریکا په وړاندې د یو بل ملاتړ هم کوي.
