د افغانستان د دفاع وزارت ویلي، تېره شپه په ننګرهار کې د افغان هوايي ځواک هيلي کاپټر غورځېدلې، يو د هيلي کاپټر د عملې غړی او بل پوليس پکې وژل شوي او دوه تنه ژوبل شوي دي.
د دفاع وزارت ویلي، دغه پېښه تېره شپه د ننګرهار په حصارولسوالۍ/ ضلع کې په 12 بجې رامنځته شوې ده.
ويل شوي پېښه د تکنيکي مسلې له امله شوې او د بده مرغه پکې يو د هيلي کاپټر د عملې غړی او بل د ملي پوليس سرتېری وژل شوي او دوه نور ژوبل شوي دي.
د دفاع وزارت په پېښه کې د مړه شوؤ د کورنیو سره غمرازي او خواخوږي کړې ده.
په افغانستان کې له دې وړاندې د هيلي کاپټرو د غورځېدو پېښه د اکتوبر په مياشت کې شوې وه.
د دفاع وزارت په 14 اکتوبر ویلي ؤ د افغانستان د ملي پوځ دوه [ اېم ايي – 17] هيلي کاپټرې غورځېدلي او نهه تنه پکې وژل شوي وو.
ويل شوي وو دغه هيلي کاپټرې د هلمند په ناوه ولسوالۍ کې د شپې په وخت د اوچتېدو په وخت د تکنیکي ستونزې له امله غورځېدلې وې.
