واشنګټن – د فرانسې پخوانی ولسمشر نېکولاس سرکوزې په ده باندې د فساد د لګول شویو تورونو له امله د زیارت یا پنجشنبې په ورځ محکمې ته ولاړ.
په سرکوزې باندې تور دی چې هغه قاضي ته یې د معلوماتو د ترلاسه کولو لپاره د رشوت ورکولو هڅه کړې وه چاچې د ۲۰۰۷ کال د ولسمشرۍ د ټاکنو په اړه پلټنې کولې.
پخواني ولسمشر په دې ټینګار کوي چې بې ګناه دی.
دا عادي خبره نه ده چې پخوانی ولسشمر له خپلو وکیلانو سره یوځای د محکمې پر لور روان وي.
خو دا غیر عادي کار نن سبا د پاریس په کوڅو کې لیدل کېږي چېرې چې پخوانی ولسمشر نېکولاس سرکوزې د رشوت ورکولو او د خپل اغېز د کارولو له تورونو سره مخ دی.
یان کلوډې بیاجور ددغه کېس په اړه امریکا غږ ته وویل، "دا په فرانسه کې د حکومت د مشر لپاره یو غیر عادي کار دی چې د فساد لپاره محاکمه کېږي." هغه وویل، "پخوانی ولسمشر سرکوزې باندې شک دی چې یو لوړ پوړي قاضي ته یې د هغه معلوماتو د ترلاسه کولو په بدل کې د رشوت ورکولو هڅه کړې چې د نېکولاس سرکوزې په اړه یې یوې روانې قضايي دوسیې باندې کار کاوه."
څارنوالان وايي، سرکوزې لوړ پوړي قاضي ته په مونېکو کې د لوړې دندې ژمنه ورکړې وه تر څو د هغو ادعاو په اړه ده ته معلومات ورکړي چې سرکوزې د ۲۰۰۷ کال د ولسمشرۍ په کمپاین کې له لااوریال کمپنۍ څخه غیر قانوني پيسې اخېستې وې.
خو سرکوزې تل دغه ادعاوې رد کړې دي.
تمه ده د سرکوزې محکمه به درې اونۍ دوام وکړي. کچېرې پکې مجرم وموندل شي نو په لس کاله بند او ۱.۲ میلیونو ډالرو جریمې باندې به محکوم شي.
