لاس رسیدونکی لینک

Breaking News

چمن: په پوله د نښتې وروسته د باب دوستي تړل شوې لار څو ساعته پس بيا پرانستل شوه


د پاکستان او افغانستان ترمنځ د بلوچستان صوبې د چمن پولې سره نزدې په کلي لقمان د ازغن تار لګولو په سر نښته شوې چې له امله يې د چمن د باب دوستۍ دروازه تړل شوې خو د خبرو پينځه ساعته وروسته بيا پرانستل شوې ده.

پاکستان د افغانستان سره د ډېورنډ په پوله د سيمو ازغن تار لګوي.

د سیمې څخه د ډيوه خبريال نعمت الله ترمخه د پولې څخه يې مالومات ترلاسه کړي چې په کلي لقمان کې د سيمو د ازغن تار لګېدو په وخت د دواړو خواو ځواکونو په يوبل د درنې وسلې ډزې کړي دي.

د دغه پېښې وروسته د چمن د باب دوستۍ دروازه د پينځه ساعتونو دپاره د هر ډول تګ راتګ دپاره تړل شوې خو بيا د دواړو خواو د چارواکو د ليدو وروسته دروازه بيرته پرانستل شوې ده.

د ځايي چاﺭواکو په وينا نن سهار د ګل/دوشنبې په ورځ (26 فرورۍ) نهه بجې شاوخوا هغه وخت دغه پېښه رامنځته شوې چې پاکستاني ځواکونو په پوله د سيمو ازغن تار لګولو.

په ډزو کې د مرګ ژوبلې خبر مخې ته نه دی راغلی.

دا لومړی ځل نه دی د چمن په سيمه د پاکستان له لوري د اغزن تار د غځولو په سر مخکي هم څو ځله د افغان عسکرو او پاکستاني ملیشو نښتي رامنځ ته شوې وې چې وروسته بيا د خبرو له لارې حل شوي دي.

د چمن د سوداګرو د چېمبر اف کامرس يو غړی عبدالغني وايي، چې په پوله د نښتې د پېښې رامنځته کېدو وروسته په پوله د افغان ټرانزټ ټرېډ هم ودرول شوی وو او د لسګونو په شمېره کې ګاډي په پوله ايسار شوي وو.

نوموړي وویل، په پوله چې چرته هم نښتې کيږي د چمن د تګ راتګ دروازه تړل کيږي زور یې عامو خلکو او سوداګرو ته رسي.

هغه وویل پکار ده چې په پوله امنيتي شخړې د باب دوستۍ د دروازې سره ونه تړل شي، عام خلک او سوداګر يې ښکار نه شي.

XS
SM
MD
LG