واشنګټن ـــ د افغانستان دیني عالمانو یو ځل بیا په داسې وخت کې په دې هېواد کې د افغان ځواکونو په ضد د طالبانو جګړه غیراسلامي بللې چې طالبانو له تېرو دوو میاشتو جګړې ته زور ورکړی او ګڼ شمېر ولسوالۍ یې نیولې دي.
د افغانستان د دیني عالمانو شورا د شنبې- خالي په ورځ په هېواد کې وروستيو حالاتو ته په کتو په یوه غونډه کې د افغان امنیتي او دفاعي ځواکونو ملاتړ اعلان کړی او روانه جګړه یې یو ځل بیا ناروا بللې ده.
د دغې شورا مشر مولوي سردار ځدراڼ په کابل کې خبري کانفرنس ته د غونډې د پرېکړه لیک خپرولو په وخت وویل چې د جګړو دواړه خواوې باید ژر تر ژره روانه جګړه پای ته ورسوي.
ښاغلي ځدران پر طالبان ږغ وکړ چې د اسلام او جهاد په نوم جګړه دې ختمه کړي او اسلام دې نه بدناموي. نوموړي وويل جګړه د حل لاره نه ده او په تېرو شلو کلونو کې دا ثابته هم شوه.
ښاغلي ځدران ټینګار وکړ چې ټول افغان عالمان به د سولې په بهیر کې لا زیات خپل کردار تر سره کړي.
د افغانستان د دیني عالمانو شورا په داسې وخت کې د افغان امنیتي ځواکونو ملاتړ اعلان کړی چې د دې هېواد په اکثرو ولایتونو کې دا مهال جګړه روانه ده او هره ورځ افغان دفاعي ځواکونه او طالبانو یو بل ته د مرګ ژوبلې اړولو دعوې کوې.
په افغانستان کې په دې وروستیو کې یو شمېر ولسي خلکو او پخوانیو جهادي قوماندانانو د طالبانو په ضد پاڅون اعلان کړی او د افغان ځواکونو په ملاتړ له هغوی سره جنګېږي.
د افغانستان د عالمانوو شورا په دې هېواد روانه جګړه ناروا او ورور وژنه وبلله او د هر څه ژر پای ته رسېدو غوښتنه يې وکړه. مولوي سردار محمد ځدراڼ وویل دې جګړې یواځې او یواځې افغانستان او افغانان زیانمن کړي دي.
له دې وړاندې هم د افغانستان د عالمانو تر څنګ د ګڼو اسلامي هېوادونو عالمانو د افغانستان جګړه ناروا بللې او د تاوتریخوالي د پای ته رسېدو غوښتنه يې کړې ده خو طالبانو یې غوښتنه نه ده منلې.
طالبانو د افغان دیني عالمانو د شورا د تازه غونډې او غوښتنې په اړه په رسمي توګه څه نه دي ویلي خو د دې ډلې ویاند ذبیح الله مجاهد ازادي رېډيو ته ویلي، د هغو عالمانو خبرې ورته ارزښت نه لري چې مخکې یې هم د امریکایي ځواکونو پاته کېدل غوښتل.
د یادونې وړ ده چې په تېره جون میاشت کې په سعودي عربس کې هم د پاکستان، افغانستان او نورو اسلامي هېوادونو د دیني عالمانو په ګډون سعودي عالمانو په یوه غونډه کې د افغانستان د جګړې د ختمېدو غوښتنه کړې وه.
په هغه کنفرانس کې چې په مکه مکرمه کې جوړ شوی وو دیني عالمانو په افغانستان کې د جګړې او وینې تویېدو بندېدل غوښتي وو او په جنګ کې له ښکېلو اړخونو یې غوښتي وو چې سوله وکړي خو طالبانو تل د دیني عالمانو دا ډول غونډې له پامه غورځولې او خپله جګړه یې روانه ساتلې ده.
