لاس رسیدونکی لینک

Breaking News

ارګ:په کابل ښار برید نه دی شوی:طالبان،کابل ته په زوره نه ننوځو


دافغانستان حکومت هغه اوازې رد کړي چې ګنې د یکشنبې په ورځ وسله والو طالبانو په کابل ښار برید کړی اؤ طالبان دکابل ته ننوتي دي.

دیکشنبې په ورځ په ټولنیزو رسنیو اؤ په ځانګړي ډول داسې اوازې خورې شوې وې چې طالبان کابل ته ننوتل اؤ دامریکا په سفارت چورلکو حفاظتې الوتنې پیل کړې.

خو لږه شیبه وروسته دافغانستان صدارتي ماڼۍ یا ارګ پخپل یو لنډ بیان کې سپیناوی وکړو چې په کابل ښار برید نه دی شوی.

په ټویټر په د ارګ خپور شوي بیان کې ویل شوي چې په کابل ښار پراګنده ډزې شوي خو برید پرې نه دی شوی.

بیان کې دکابل ښاریانو ته ډاډ ورکړل شوی چې دهیواد امنیتي اؤ دفاعي ځواکونه بین المللي همکارانو سره په ګډه دښار امنیت تامینوي اؤ وضعیت په کنټرول کې دی.

په کابل دبریدونو اندېښنې وروسته له هغې زیاتې شوي چې دیکشنبې په سهار دپاکستان سره په پوله پروت مهم خیتز ولایت هم دطالبانو لاسو ته پریوتو.

خو طالبانو پخپله یوه اعلامیه کې پخپلو وسله والو غږ کړی چې کابل ته دننوتلو نه ډډه وکړي.

اعلامیه کې ویل شوي طالبان اراده نه لري چې کابل ته په زور اؤ جګړې سره ننوځي بلکې کابل ته په رضا سلا دننوتلو دپاره مقابل لوري(افغان چارواکو) سره خبرې اترې روانې دي.

طالبانو پخپله دې تازه اعلامیه کې خپلو وسله والو ته ویلي چې باید دکابل په دروازو کې ودریږي خو کابل ته دې نه ننوځي ترڅو جګړه کې بېګناه خلکو ته مرګ ژوبله وانه وړي.

دا په داسې حال کې ده چې طالبان دعوه کوي دهیواد په ۳۴کې ۲۶ ولایتونه یې دخپل واک لاندې راوستي دي.

اسلام اباد کې میشت په افغان چارو ژور نظر لرونکی خبریال طاهر خان دیکشنبې په ورځ وي او ای ډیوه ته ویلي دطالبانو دمذاکراتي کمیټې یو مهم غړي ورته ویلي چې دامریکا اؤ طالبانو ترمنځ شوي د دوحې تړون کې داخبره شامل ده چې هیڅ یو لوری به کابل په زوره نه نیسي.

طاهر خان وایي نن دافغانستان نه یو پلاوی قطر ته تلونکی دی اؤ هیله ده چې دخبرو اترو دلارې به د روانې غمېزې یو څه حل راوځي.

XS
SM
MD
LG