د پاکستان د بهرنيو چارو وزارت ویلي د افغانستان د ګاونډيو ملکونو سره د دغه هيواد په روانو حالاتو د بحث دپاره آن لاين غونډه نن په اتم ستمبر رابلل شوې ده.
ويل شوي د پاکستان د بهرنيو چارو وزير شاه محمود قرېشي به د دې غونډې کوربه او مشري کوي.
د بهرنيو چارو وزارت ويلي په غونډه کې به د چين، ايران، تاجکستان، ترکمانستان او ازبکستان د بهرنيو چارو وزيران ګډون کوي.
په بيان کې زياته کړی شوې ده چې په غونډه کې به د افغانستان په بدلېدونکو حالاتو او شريکو ننګونو د حل او سيمې د ثبات او امن يقيني په اړه بحث کیږي.
د پاکستان د بهرنیو چارو وزارت ویلي، د افغانستان ګاونډي هيوادونه د دغه هيواد په ثبات کې مهمه برخه لري.
ويل شوي يو سوله یيز، باثباته، متحد، خپلواکه او سوکاله افغانستان به د ټرانزټ سوداګرۍ، د خلکو په کچه د اړیکو او امنيت په لړ کې رول ولوبوي.
پاکستان د ننۍ غونډې خبر پرون په اووم ستمبر ورکړی وو.
هم پرون په افغانستان کې طالبانو لنډ مهاله کابينه اعلان کړې ده. د طالبانو ویاند ذبیح الله مجاهد چې د کابينې اعلان په خبري غونډه کې کړی وو، په دغه مهال يې ویلي وو د امریکا په شمول د ټولو هېوادونو سره اړیکې جوړول غواړي.
د طالبانو د حکومت په رسميت پېژندو يا تسليمولو په اړه تر اوسه کوم هېواد څه نه دي ویلي.
خو په 15 اګست چې طالبانو کابل او د افغانستان زیاتره برخې نيولې په 17 اګست د پاکستان د اطلاعاتو وزير فواد چودري ويلي وو، په افغانستان کې د طالبانو د حکومت تسلیمولو فېصله به د سيمې او نړۍ د قوتونو سره په مشوره کوي.
هغه وخت چين ویلي وو په نړيواله ورورولۍ غږ کوي چې د طالبانو د مثبت مخ ډاډګېرنه او ورته لارښوونه وکړي.
او د امریکې د سپينې ماڼۍ وياندې جېن ساکي د طالبانو د کابینې د اعلان نه څو ورځې وړاندې ويلي وو امریکا په افغانستان کې د راتلونکي نوي او غېر منتخب حکومت سره د تعلق په حقله انتظار کوي او حالاتو ته ګوري.
جېن ساکي ویلي وو د وفاقي حکومت دننه صدر، د دفاع وزیر او په استخباراتي ټولنه کې یو کس هم دا نه وايي چې طالبان سم خلک دي.
هغې زیاته کړې وه همدا وجه ده د دوی دریځ ډېر واضحه دی چې د طالبانو په تسلیمولو (په رسمیت پېژندلو) کې تادي نه کوي او دوی به حالاتو ته ګوري.
