په افغانستان کې د نړيوال پروګرام مشر د شورو/ چهارشنبې په ورځ ويلي په دغه ملک کې بشري بحران د ژمي راتلو نه وړاندې په تيزۍ سره سېوا کيږي.
په افغانستان کې د خوراک د نړیوال پروګرام مشرې مېرې اېلن مکګرورټي د کابل څخه په انلاين بڼه خبريالانو سره په خبرو کې ویلي، ژمی رارسېدلی په درواز مو ولاړ دی. په افغانستان کې سخت يخ موسم دی، د تيلو بيې لوړيږي خلک د لوږې ختمولو او ځان تود ساتلو دپاره هڅې کوي.
ویل شوي په 15 اګست د طالبانو په کابل کې په واک کې د راتلو نه وړاندې هم دغه هېواد د وچکالۍ، شخړو، غبن او کرونا وايرس د بحران سره مخ وو.
په افغانستان کې د 18 ملينو نه زيات خلک بشري مرستو ته اړتيا لري په دوی کې 14 ملينه هغه دي چې د خوراک د نشتوالي سره مخ دي او دوه ملينه ماشومان دي چې د خوراک د کمي خطره ورته ورپېښه ده.
ملګرو ملتونو ويلي، هغه خلک چې ضرورتمند دي د هغو شمېرې سېوا کيږي ځکه چې د خوراکي توکو او تيلو بيې لوړیږي او روزګارونه کمیږي.
مېکګرورټی ويلي، چې د اګست د مياشتې نه وروسته بحران نور په تيزۍ سره سېوا کيږي.
مرستندويه چارواکې ويلي، هغه نن د کابل نه بهر وو حالات ډېر د خفګان وړ دي، ښځو ورته د خوراک دپاره نعرې وهلې ځکه چې روزګار کميږي کار نشته، داسې موقع نشته چې خوراک ترې ترلاسه شي.
هغې ویلي ډېرو ښځو ورته ویلي چې د دوی سره يواځې لږ خوراک او اوبه دي.
د نړيوالې ادارې ترمخه افغانستان د سخت اقتصادي او مالي بحران سره مخ دی، دا هېواد بهرنيو مرستو ته اړتيا لري او د طالبانو د راتلو سره فنډونه ودرول شوي دي.
مېکګرورټي ويلي دوی د ضرورتونو د مسلې هوارولو دپاره اقتصاد بحالولو ته اړتيا لري. هغې خبرداری ورکړی که دا مسله هواره نه کړی شوه د افغانستان حالات به ډېر خراب شي.
ویل شوي د ملګرو ملتونو ادارې د ستمبر په مياشت کې پينځه ملينه افغانانو ته مرستې رسولي دي او د خوراک نړیوال پروګرام درې اعشاريه اته ملينه کسانو ته خوراکي مرستې ورکړي دي.
ملګرو ملتونو د روان کال دپاره د 606 ملينه ډالرو مرستې غوښتې چې پکې ويل شوي په دغه رقم کې يواځې درېمه برخه ترلاسه شوې ده.
