د پاکستان حکومت اجازه ورکړې، چې د هند نه افغانستان ته کوم 50زره مېټرک ټنه غنم او درمل (دوایانې) لېږل کيږي، دغه غنم او درمل به افغان ټرکونه د هند سره د پاکستان د واهګه پولې نه د تورخم په لاره وړي.
د پاکستان د بهرنيو چارو وزات په درېم دسمبر ويلي، دغه کار د پاکستان د هغو ژمنو څرګندونه کوي، چې د پاکستان حکومت په افغانستان کې په انساني بنیادونو بشري مرستو ته اسانتیاوې برابروي.
ويل شوي د پاکستان د بهرنیو چارو وزارت دغه پرېکړه د هند د ناظم الامور سره شريکه کړې ده.
د پاکستان د بهرنیو چارو وزارت ويلي، پاکستان د هند په حکومت غږ کړی چې څومره زر ممکن وي، د افغانستان د بشري مرستو دپاره ګامونه پورته کړي او دغه مرستې ورسوي.
د ډان ورځپاڼې ترمخه د پاکستان حکومت دا پرېکړه په داسې حال کې کړې چې د افغانستان دپاره د يورپي يونين استازي تومس نيکلېسن په اسلام اباد او نوي ډهلي غږ کړی چې د هند نه افغانستان ته لېږونکو بشري مرستو مسله دې هواره کړي.
د هندوستان حکومت د اکتوبر په مياشت کې د افغانستان لپاره د 50 زره ټنه غنمو ورکولو اعلان کړی وو او د پاکستان څخه يې اجازه غوښتې وه، چې د غنمو لېږلو دپاره د واهګه په پوله اجازه ورکړی شي.
هند غوښتنه کړې وه چې د هند ټرکونه به دغه غنم د پاکستان د لارې افغانستان ته وړي، خو پاکستان د هند د ټرکونو غوښتنه نه وه منلې.
د نومبر په میاشت کې د پاکستان په سفر راغلي د افغان طالبانو د بهرنيو چارو وزیر امير خان متقي هم د پاکستان وزيراعظم عمران خان ته د دغو غنمو د پاکستان د لارې افغانستان ته د اړولو خواست کړی وو.
د پاکستان حکومت دا تازه اجازه په داسې حال کې ورکړې چې ملګري ملتونه وايي په افغانستان کې نيمايي خلک د لوږې او خوراک د کمي سره مخامخ دي.
د خېر ښېګړې نړيوال تنظيمونه وايي چې د اقتصادي بندیزونو کړکېچ په ځپلي افغانستان کې په پراخه کچه کړاونه رامنځ ته کولی شي.
