لاس رسیدونکی لینک

Breaking News

پاکستان: وزیراعظم ته د پوځ او ايي اېس ايي مشرانو د افغانستان په اړه احوال وړاندې کړی


د پاکستان وزيراعظم ته د پوځ مشر او استخباراتي ادارې مشرانو په افغانستان کې بدلېدونکو حالاتو باندې احوال وړاندې کړی دی.

د اطلاعاتو وزير فواد چودري نن د زيارت/پنجشنبې په ورځ (13جنورۍ) په ټویټر ويلي دغه لیدنه پرون شوې ده.

هغه ويلي، "پرون وزیراعظم (عمران خان) د ايي اېس ايي د مرکز سفر کړی، د پوځ مشر، د ايي اېس ايي مشر او د هغه ټيم وزیراعظم ته افغانستان په بدلېدونکو حالاتو تفصيلي احوال وړاندې کړی دی".

هغه ويلي، "زمونږ مقصد افغانستان باثباته جوړول دي، او د هغې دپاره پاکستان ډېر کار کړی دی، نن نړۍ د پاکستان نظر ته نزدې راځي".

د پاکستان لوړ پوړو چارواکو وزیراعظم ته د افغانستان په اړه احوال په داسې حال کې وړاندې کړی چې له دې نزدې یوه اوونۍ وړاندې ويل شوي وو د وزیراعظم د ملي امنيت سلاکار معيد يوسف به ډېر زر د لوړ بوړي پلاوي سره د کابل سفر وکړي.

که څه هم د دغه سفر په اړه په دولتي کچه کومه نېټه نه ده ورکړی شوې خو پاکستانۍ ميډیا داسې خبرونه خپاره کړي چې ښايي دغه سفر د 17 جنورۍ څخه پېل شي.

دا افغانستان په اړه په پاکستان کې تازه ليدنې او پرمختګونو په داسې حال کې رامنځته کيږي، چې په وروستيو کې د پاکستان او افغانستان ترمنځ پوله (ډېورنډ) باندې د طالبانو او پاکستاني پوځ ترمنځ پېښې شوې وې.

د پاکستان د پوځ وياند مېجر جنرل بابر افتخاار او په افغانستان کې د طالبانو د بهرنيو چارو وزارت دواړو دغه پېښې تاييد کړې وې.

بل لور ته په دسمبر کې د پاکستان د حکومت سره تحریک طالبان پاکستان (ټي ټي پي) د يوې میاشتې ډز بندي هم ختمه کړې ده.

پاکستان ويلي وو په افغانستان کې د واکمنو طالبانو په خواست د ټي ټي پي سره مذاکرات پېل کړی شوي وو او د دغو مذاکراتو کول د افغان طالبانو د حکومت د بهرنيو چارو وزير امير خان متقي هم تاييد کړي وو.

او بيا پوځي وياند په پينځمه جنورۍ ويلي وو، چې ډز بندي ختمه شوې او د ټي ټي پي پرضد جګړه دوام لري.

په افغانستان کې په 15 اګست د طالبانو په واک کې د راتلو وروسته په پاکستان په امنیتي ځواکونو بريدونه سېوا شوي او پوځي وياند منلې وه چې په 2021 کې د افغانستان سره په پوله حالات مشکل پاتې شوي دي.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

XS
SM
MD
LG