واشنګټن – چینايي چارواکي کوښښ کوي چې د ژمنیو المپیک سیالیو څخه دمخه د کورونا د اومېکران ډول کنترول کړي.
ټاکل شوې ده چې دغه لوبې په راتلونکې فیبرورۍ میاشت کې پیل شي.
د چین په ژوهې نومي سیمه کې چارواکو وروسته له هاغې د بسونو خدمات ځنډولي دي چې د کورونا د نوي ډول اوه پېښې پکې وموندل شوې او له خلکو یې وغوښتل چې په کورونو کې پاتې شي.
په راتلونکو یو دوه اونیو کې به امریکایانو ته د حکومت لخوا په کورونو کې د کورونا وایرس د ټېسټونو وړیا وسایل واستول شي.
خلک باید د کورونا د دغو وړیا ټېسټونو د ترلاسه کولو لپاره په ځانګړو ویبپاڼو باندې درخواستونه واستوي.
دغه ټېسټونه نېږدې نا ممکنه دي چې په بازارونو او دوکانونو کې وموندل شي.
امریکايي چارواکو همدارنګه د جمعې په ورځ امریکایان هڅولي دي چې له N95 او یا KN95 ماسکونو څخه کار واخلي چې تر اوسه یواځې روغتیايي کارکونکو کارول.
په امریکا کې د ناروغیو د کنټرول او مخنیوي ادارې چارواکو ویلي، دغه ډول ماسکونه د اومېکران ډول په کنټرول کې ډېر اغېزمن دي.
د هندوستان روغتیايي چارواکو د شنبې یا خالي په ورځ وویل، دوی د کورونا ۲۶۸۸۳۳ نوې پېښې موندلې دي چې دا د جمعې د ورځې په پرتله ۴۶۳۱ زیاتې دي.
د روس حکومت د جمعې په ورځ د هغې قانوني مسودې تصویب کول ځنډولي د کوم له مخې به چې عامه ځایونو ته خلک د کورونا د واکسین اخیستلو له ثبوت پرته نه پرېښودل کېږي. په روس کې هم د کورونا د نویو پېښو شمېر زیات شوی دی.
اسوسېټېډ پریس راپور ورکړی چې ددغه بېل له مخې به له روسانو څخه غوښتل کېدل چې عامه ځایونو ته له ورتګ څخه دمخه د QR کوډ وښيي چې په هغې کې د واکسین اخېستلو ثبوت او له کورونا څخه د ښه کېدو ثبوت وي.
په دغه کوډ کې دا هم ښکاري کچېرې یو څوک د طبي اړتیا له مخې له واکسین اخېستلو څخه معاف شوې وي.
د روسیې د لومړي وزیر مرستیالې تتیانا ګالېکوا ویلي، چې دا مهال په روس کې د کورونا په نویو پېښو کې زیاتوالی راغلی.
هغې وویل، په روسیه کې د اومېکران ۷۸۳ پېښې تایید شوي چې د ماسکو د چارواکو په وینا ۷۲۹ یې په ماسکو کې د ډیسمبر له ۲۰ راهیسې موندل شوې.
په ورته وخت کې د فرانسې یوې محکمې د باندې په سړکونو د ماسکونو د تړلو اړتیا ځنډولې ده.
په فرانسه کې د ډیسمبر په ۳۱ نېټه کله چې اومېکران په چټکۍ سره خپرېده پرېکړه شوې وه چې په سړکونو باندې د ګرځېدو پر وخت دې هم خلک ماسکونه وتړي.
د جان هاپکېنز پوهنتون د شنبې یا خالي په سهار خبر ورکړ چې تر اوسه پورې د کورونا ۳۲۳.۷ میلیونه پېښې موندل شوي چې بیا ۵.۵ میلیونه یې له کورونا څخه مړه شوي هم دي.
یاد مرکز ویلي، چې تر اوسه په نړۍ کې د کورونا ۹.۶ بیلینه ډوزه واکسین خلکو ته ورکړل شوی دی.
