لاس رسیدونکی لینک

تازه خبر

پاکستان

په بلوچستان کې د پوهنتون یو محصل او د ټولنیزې رسنۍ یو فعال بې درکه شوي دي

د بې درکه شویو کورنيو د سازمان مرستيال مشر ماما قدير بلوڅ
د بې درکه شویو کورنيو د سازمان مرستيال مشر ماما قدير بلوڅ

په بلوچستان کې له پنجګور څخه د ټولنیزې رسنۍ یو فعال ملک میران او له خضدار څخه د اسلام اباد پوهنتون د ایم فل یو زده کونکی حفیظ الله لادرکه کړای شوي دي.

د پنجګور د سرحدي ضلعې نه د ټولنیزې رسنۍ فعال ملک ميران د ګل یا دوشنبې له ورځې لادرکه شوی او د هغه د کورنۍ غړي تور لګوي چې میران حکومتي ادارو وړی دی خو حکومتي ادارو تر اوسه په دې اړه څه نه دي ویلي.

د ملک میران ورور محمد شریف بلوڅ ډیوې ته وويل، چې د شپې څلور بجې یې کور ته په دوؤ ګاډو کې کې د ساده جامو خلک ورغلل دروازه یې وټکوله او ملک میران یې چې د هغه مشر ورور دی له ځانه سره بوتلو.

محمد شریف وویل ورور یې ملک میران په جبري توګه لادرکه کړای شوی دی او د هغه یواځینۍ ګناه دا وه چې د ټولنیزو رسنیو فعال و.

هغه وويل چې میران د خلکو غږ و او په ټولنيزو رسنيو يې د حکومت پرضد خپل غم او درد څرګنداوه.

د بلوچستان بنګور هغه سیمه ده چې بلوڅو بېلتون غوښتونکو پکې د پاکستان د امنیتي‌ ځواکونو په یو مرکز باندې درې ورځې خونړۍ جګړه وکړه چې د هغوی په وینا ۱۹۶ امنیتي ځواکونه یې پکې ووژل خو د پاکستان پوځ پکې یواځې د خپلو نهو سرتېرو د وژل کېدو خبر تاییدوی.

بل پلو د خضدار په سيمه کې حاجی محمد حسن وويل، چې دده زوې حفيظ الله د جنورۍ د مياشتی پر پنځه وېشتمه له اسلام آباد څخه د رخصتي له پاره راغلی وؤ هلته په قاید اعظم پوهنتون کې د فزکس د ايم فل زدکونکی و.

هغه وايي، تېره ورځ ماذدیګر یې په يو شخصي اسکول کې ځایي ماشومانو ته درس ورکاوه چې خلک راغلل په زوره یې له ځان سره یوړ.

د مکران کمشنر د دې خبرې پخلی وکړ چې د ملک مهران د ورکېدو په هکله درخواست ورکول شوې دي. ده مرستيال کمشنر ته امر کړې دي چې په دې اړه دې پلټنې وکړي.

د بې درکه شوؤ کورنيو د سازمان مرستيال مشر ماما قدير بلوڅ ادعا وکړه چې عمليات روان دي او د بلوچستان له نورو سيمو څخه هم په زوره باندې ځوانان بې درکه کړاې شوي دي خو نور تفصيل یې ورنه کړ.

د بلوچستان د بشري حقوقو د سازمان غړي شمس مندوخيل وايي، چې د لاهور د انار ګلی د چاودنې وروسته هم هلته يو شمېر د بلوچستان زدکونکې کې ځورول شوي وو اوس بيا د ملک مهران او حفيظ الله بې درکه کېدل د اندېښنې وړ او د پاکستان د اساسي قانون څخه سر غړه ونه ده.

مندوخېل وړاندې وویل، چې بې درکه کړای شوي کسان باید عدالت ته وړاندې کړې شي که جرم پر ثابت شو سزا دي ورکړل شي او که نه نو خوشې دې کړای شي ځکه که داسې ونشي نو له دې سره په خلکو کې کرکه نوره هم زیاتېږي.

پر ټولنیز رسنۍ باندې هم د ملک میران او د حفيظ الله د راخوشې کېدو غوښتنه شوې ده.

See all News Updates of the Day

بنو کې د پرونۍ پېښې خلاف پرلت: پښتونخوا او بلوچستان کې وکیلانو له قضایي چارو بایکاټ کړی

د پښتونخوا په بنو کې د امن په ولسي پاڅون شوو پرونیو ډزو کې د اوښتې مرګ ژوبلې خلاف نن د خالي یا شنبې په ورځ د بنو پولیس لاین مخې ته تاجرانو اؤ ځایي خلکو احتجاجي پرلت وهلی اؤ په پښتونخوا او بلوچستان کې وکيلانو د قضایي چارو یا عدالتي کاروايۍ نه بایکاټ کړی دی.

د خېبر پښتونخوا صوبي وزيراعلا علي امين ګنډا پور د بنو د پېښې د هر اړخيزه پلټنو دپاره د کمېشن جوړولو اعلان کړی دی.

تېره ورځ په بنو کې زرګونه خلک د امن د غوښتنې لپاره سړکونو ته راوتلي وو او احتجاجي لاریون یې کولو چې په دغه د احتجاج په برخه والو ډزې شوې وې اؤ هغوي ته یې مرګ ژوبله اړولې وه.

د احتجاج ګډون والو او د پښتون ژغورنې غورځنګ مشر منظور پښتین تور لګولی چې په لاریون کوونکو پوځ نېغ په نیغه ډزې کړي خو پوځ لا په دې هکله څه هم نه دي ویلي.

د پاکستان د بشري حقونو له کمیشن وروسته د بشري حقونو یوه نړیوال تنظیم ایمنیسټي انټرنېشنل هم ویلي، په بنو کې په پرامنه احتجاج کوونکو "د افسرانو ډزې" د بشري حقونو د نړیوال قانون او د پاکستان د خپل آیین سرغړونه ده.

ایمنیسټي انټرنېشنل د جولای پر 19مه پر خپل ایکس په یوه تفصیلي پوسټ کې ویلي، د سوله ییز احتجاج خلاف له وژونکي زوره کار اخیستل غیرقانوني دي او د ملګرو ملتونو د بنیادي اصولو خلاف کار دی:

"په بنو کې د موبایل او انټرنیټ بندول د خلکو د را غونډېدو وړتیا کموي، د بیړني حالت په وخت کې د غلطو معلوماتو د خپرېدو امکان زیاتوي او ویره خپروي".

ایمنیسټي انټرنېشنل وایي‌ د پاکستان حکومت په پرله پسې ډول د پرامنه غونډو د جوړېدو په وخت د احتجاج کوونکو د خوندیتوب په ډاډمنولو کې پاته راغلی دی. وایي حکومت باید زر تر زره د بنو د برید په اړه پلټنه وکړي او ذمه وار کسان ونیسي.

د دغه پېښې په ضد نن د خالي په ورځ د پښتونخوا بار کونسل په غږ په ټوله صوبه کې وکيلانو د عدالتي کارروایۍ بايکاټ وکړو او د بنو پېښه یې په سختو ټکو کې وغندله.

وکيلان وایي د پاکستان اساسي قانون هيڅ يوي رياستي اداري ته دا حق نه ورکوي چې د چا ژوند واخلي بلکي دستور هر وګړي ته د احتجاج او بيان د ازادۍ حق ورکړی دی۔

په بلوچستان کې هم نن د بنو د پېښې په ضد د وکيلانو تنظيمونو له عدالتي کاروایي څخه بايکاټ کړى او د پښتنو سیاسي ګوندونو د احتجاج اعلان کړی دی.

د وکيلانو اتحاد بلوچستان بار کونسل او د بلوچستان هایکورټ بار اېسوسي اېشن په غوښتنه د ګډې اعلاميې په ترڅ کې دغه کاربنديز شوی او وکيلان عدالتونو ته نه دي حاضر شوي، چې له سوبه یې عدالتي چارې په ټپه ولاړې وې.

د وکيلانو اتحاد مشرانو وويل، د خلکو د ژوند او مال ساتنه د حکومت لومړۍ ذمه وارى ده، د دوى په خبره په بنو کې پر سوله ييز لاريون بريد کول، د اندېښنې وړ خبره ده. دوى د عدالتي کمېشن په وسیله د بنو د پېښې د پلټنو غوښتنه وکړه.

د سپریم کورټ وکیل محمد ارشد يوسفزي وي او ای ډيوه سره خبرو کې وویل د کال ۱۹۷۳م ایین د پاکستان هر وګړي ته دا حق ورکوي چې خپل پرامنه احتجاج وکړي اؤ خپلې غوښتنې مخې ته راوړي.

قانون پوهان وايي بنو کې رياستي ادارو د خپلو اییني ذمه واریو څخه تجاويز کړی بايد چې مقامي انتظامیې د احتجاج کوونکو سره مذاکرات کړي وؤ.

د سپریم کورټ یو بل وکیل ښاغلی ممتاز احمد ډيوه سره خبرو کې وایي ایین اؤ قانون دا اختیار هیچا له نه دی ورکړی چې د حکومت اؤ یا د کومې ادارې خلاف څوک احتجاج کوي نو هغه دې نیغ په نیغه په ګولیو وویشتل شي.

هغه وایي "د هغي دپاره د پوليس محکمه ده ،هغوي دي رامخې ته کړی شي ،د هغوي سره دي مذاکرات وکړی شي، خبرو کې دې سول ايډمينسټريشن شامل کړی شي چې يو کس څومره ګيله من دي او هغه ګيله دهغه څومره پورې جایز ده ،خو وژل يا زخمي کول دا اختيار په ايين کې چاته هم نه دی ترلاسه".

پښتون ملتپالو ګوندونو پښتونخوا نېشنل عوامي ګوند، عوامي نېشنل پارټۍ او د نېشنل ډيموكرېټک غورځنګ له خوا د بنو د پېښې خلاف په بلوچستان کې احتجاجونه شوي دي، دوى د کوټې د پریس کلب مخې ته هم احتجاج کړی دی.

په احتحاج کې وينا کوونکو وويل چې په ټوله نړۍ کې هرڅوک د سوله ییز احتجاج حق لري خو "دلته داسې ښکاري چې د يو ناوړه پلان له مخې احتجاج کول بندول غواړي".

د بنو قامي جرګې له اعلان وروسته نن د خالي په سهار د بنو د پېښې په ضد د بنو پولیس لاین مخې ته احتجاجي پرلت پېل شوی چې په ګڼ شمیر کې پکې تاجرانو، مدني فعالو اؤ د سیمې خلکو ګډون کړی .

په بنو کې پرونی احتجاج چې زرګونو خلکو پکې ګډون کړی وو.
په بنو کې پرونی احتجاج چې زرګونو خلکو پکې ګډون کړی وو.

د سوداګرو اتحادیې مشر ناصر خان بنګښ مشال راډیو ته ته ویلي چې تر هغې پرلت ته دوام ورکوي چې غوښتنې یې نه وي منل شوی.

هغه وویل یوازینۍ غوښتنه یې په سیمه کې د امنیت د ټینګښت ده. بنګښ وویل، دوی د عزم استحکام عملیاتو مخالفت کوي او په سیمه کې د ناکرارۍ ختمولو غوښتنه کوي.

پرلت د پولیسو د مرکز مخې ته وهل شوی دی. دا ځای د بنو پوځي مرکز ته مخامخ د سړک بلې غاړې ته دی.

قانون پوهان وايي د پښتونخوا په زياتره سېمو کې ناامني د پاکستان د رياست د ناسمو پالسيو نتيجه ده او اوس دغه جګړه د لرې پرتو سيمو ورسته ښارونو ته رارسېدلي ده۔

قانو پوه رحيم شاه اپریدی ډیوه ته وایي "دا خودساخته دهشت ګردي د پاکستان رياست په خپله کوي او ځای په ځای باندي دا روانه ده او دا انارکي يا سول وار طرف ته پښتانه بوتلل غواړي تر ډيره حده پوري يي بوتللي هم دي".

د هغه په خبره "په قبايلي علاقو کې ځاي په ځاي جنګ شورو دی، په بلوچستان کې شورو دی، اوس خبره ښارونو ته راغله په ښارونو کې هم دغه دی جنګ شورو دی يو شکل یې روان دی او بهته خوري خو عام ده په ښارونو کې".

د خېبر پښتونخوا حکومت بنو کې د امن پاڅون په ګډون والو د ډزو د پيښې د رڼو پلټنو دپاره د کمېشن جوړولو اعلان کړی دی او ويلي یې دي کمېشن به د بي طرفه پلټنو وروسته خپل رپورټ وړاندي کوي چې له هغې وروسته به پيښه کې د ککړو کسانو پرضد قانوني کارروایي کولی شي او دغه رپورټ به عام ولس ته هم وړاندي کولی شي۔

سردار احمد شکیب: کېدای شي د ټي ټي پي ځینې عناصر افغانستان کې پټ وي

په پاکستان کې د افغان طالبانو د حکومت سفير سردار احمد شکېب ویلي د ټي ټي پي وسله والو په افغانستان کې د طالبانو د واکمنۍ نه مخکې په پاکستان کې حملې کولې خو وايي کېدای شي چې د پاکستاني طالبانو ځنې عناصر په افغانستان کې پټ وي.

د طالبانو سفیر وایي که د ټي ټي پي ځینې وسله وال په افغانستان کې پټ هم وي نو ددې مانا دا نه ده چې دطالبانو حکومت یا د افغانستان خلک د هغوي ملاتړ کوي.

دا خبره نوموړي په دې وروستیو کې په بنو کې د پاکستاني ځواکونو په مرکز د شوي بريد وروسته د افغانستان ته د اسلام اباد د احتجاج په ترڅ کې کړې ده.

د بي بي سي پښتو سره مرکه کې د طالبانو د حکومت سفير سردار احمد شکېب ویلي، پاکستاني چارواکو ته يې ويلي چې د پاکستان په نورو سيمو کې هم حملې کيږي، خو مانا یې دا نه ده چې حمله کوونکي دې په افغانستان کې اوسېږي.

هغه ویلي "د افغانستان دريځ دا دی چې هيچا ته اجازه نه ورکوي، چې د نورو پرضد داسې اقدام وکړي، که چېرې داسې څوک وموندل شي چې هغوى د بل چا پرضد د افغانستان مځکه استعمالوي، مونږ ې په اړه ګام اخلو"

د پاکستان حکومت د تېرې چهارشنبې یا شورو په ورځ په اسلام اباد کې د افغان سفارت مرستیال چارسمبالی د بهرنیو چارو وزارت ته غوښتی ؤ او په بنو کې د پاکستاني ځواکونو په مرکز په شوي برید یې ورته سخت احتجاج رېکارډ کړی و.

د جولاې په 15 مه بنو کې شوي دغه برید کې د پاکستان 8 پوځ عسکر وژل شوي وو.

کله چې په اګست کال 2021 کې طالبانو په زوره د افغانستان په اقتدار قبضه وکړه هغه مهال د پاکستان د هغه وخت وزیراعظم عمران خان ویلي وؤ چي افغانستان د غلامۍ زنځيرونه مات کړل او د پاکستان د استخباراتي ادارې آي اېس آي پخواني مشر جنرال فېض حميد هم د کابل سفر کړی ؤ.

پاکستان کې داسې ګمان کېدو چې په افغانستان د طالبانو د واک ورسته به په پاکستان کې امنيتي وضعه ښه شي، خو څېړونکي وايي له بده مرغه داسې ونه شوه.

په افغان چارو ژور نظر لرونکی خبریال ښاغلی مشتاق یوسفزی وي او ای ډيوه ته وایي،د کله نه چې د افغان طالبانو حکومت راغلی دی نو په خصوصي توګه د پاکستان قبایلي ضلعو کې حالات ډېر خراب شوي دي خو د هغې ترڅنګ د هېواد په جنوبي ضلعو کې هم پاکستان ته د امنييت زيات سنجیده ګواښونه راولاړ شوي دي.

په اسلام اباد کې د طالبانو سیاسي استازي شریف شکیب ویلي ، د ټي ټي پي وسله والو په افغانستان کې د طالبانو له واکمنۍ مخکې هم په پاکستان کې حملې کولې او د نوموړي په وینا د هغوي ډېری کسان په پاکستان کې دي، خو ښاغلي شکېب بيا وويل، کېدای شي چې د پاکستاني طالبانو د تحريک ځني عناصر په افغانستان کې پټ وي، خو مطلب یې دا نه دی " اسلامي امارت" یا د افغانستان خلک د هغوي ملاتړ کوي یا دلته پاکستان کې ورسره مرسته کوي.

تر دې وړاندې روانه اوونۍ د پاکستان د بهرنیو چارو وزارت په خپل بېان کې ویلي وو چې د بنو بريد د پاکستاني طالبانو حافظ ګل بهادر ډلې کړی او هغوي د افغان سفیر څخه غوښتي چې د طالبانو حکومت دې په افغانستان کې ددغه ډلې خلاف اقدام وکړي.

تېره ورځ د پاکستان د خارجه دفتر وياندې ممتاز زهره بلوچ هم ويلي وؤ چې پاکستان د څو میاشتو راهیسې د افغان چارواکو سره په رابطه کې دی اؤ د هغوي سره یې په پاکستان کې د بريد کونکو په اړه کره شواهد شريک کړي دي.

کارپوهان وایي د افغان طالبانو دا موقف پرځاې نه دی چې ګنې د افغانستان خاوره د پاکستان خلاف نه کارول کیږي او یا د ټي ټي پي وسله وال هلته نشته.

د امنیتي چارو کارپوهه عبدالله خان وي او ای ډيوه ته وایي،یوازې دا نه ده چې په شانګله کې په چينايي انجينرانو شوي بريد کې افغان وګړي ککړ وو، بلکې په يو شمېر حملو کې هم افغان وګړو ګډون درلود، د هغوي مړي موندل شوي دي او پېژندګلو یې شوې ده او ټولو ته معلومه ده چې د پاکستان پولې ته څېرمه د افغانستان په سيمو کې د افغان طالبانو مقامي چارواکي تر ټولو زیات د ټي ټي پي د وسله والو ملاتړ کوي.

په دې وروستیو کې د پاکستان په خېبر پښتونخوا او بلوچستان صوبو کې د ترهه ګر و ډلو لخوا د بريدونو لړۍ يو واري بيا چټک شوې چې تر اوسه په کې په سوونو امنیتي سرتيري وژل او ژوبل شوي دي.

ږوب نه د پولیو نوې پېښه مخې ته راغلې، د هنګو سخا اوبو کې هم پولیو وایرس موندل شوي

د بلوچستان ایالت د ږوب ضلعې نه د پولیو یوه نوې پېښه مخې ته راغلې چې دې سره پاکستان کې د روان کال په اوږدو کې د پولیو پېښو شمېره نهو ته رسېدلې ده.

د پاکستان د صحت قامي اداره وایي چې د خېبر پښتونخوا د هنګو سیمې څخه هم په اخیستل شوؤ ماحولیاتي نمونو کې د پولیو وایرس تایید شوی دی.

د صحت د قامي ادارې د پولیو لیبارټرۍ تر مخه د پولیو نوې پېښه د ږوب یونین کونسل حسن زۍ اربن۲ کې مخې ته راغلې ده اؤ دغلته د یو نیم کال یو ماشومان ته د پولیو وایرس ورپورې شوي دي.

د ادارې د بیان له مخې په دغه ماشوم کې د معذورۍ علامې د ۲۸م جون نه ښکاره شوې وې خو چې کوم وایرس ورپوري وي د هغې جینیاتي ارزونه لا روانه ده.

د صحت د قامي ادارې د بیان له مخې ددې تر څنګ د خېبر پښتونخوا په یوه نوې ضلعه هنګو اؤ د وړاندې څخه د اغېزمنو ضلعو په ماحولیاتي نمونو کې هم د پولیو وایرس د شتون پخلی شوی دی.

بیان وایي چې د وړومبي جولایي څخه تر دریم جولایي پورې د هنګو، کراچۍ کیماړۍ،چمن، پښین ، حیدر اباد ، جامشورو اؤ لاهور نه د نالیو د سخا اوبو څخه اخستل شوؤ نمونو کې د پولیو وایرس موندل شوي.

دا په داسې حال کې ده چې د پاکستان پولیو پروګرام سږکال د پولیو د مخنیوي په لړ کې شپږ مهمونه چلولي اؤ په جنورۍ اؤ فرورۍ کې د ټول ملک په کچه دوه ستر کمپاینونه هم سرته رسولي چې پکې د پینځوؤ کالو د عمر نه کمو ۴۰ لکو څخه زیاتو ماشومانو ته د پولیو د مخنیوي څاڅکې ورکړل شوي دي .

سږکال د پاکستان په ۵۱ ضلعو کې د پولیو وایرس موندل شوي دي ،اؤ د پولیو د مخنیوي لپاره د وزیراعظم کوارډینیټر ډاکټر ملک مختار احمد وایي چې تر اوسه نهه کسان په پولیو اخته شوي دي چې دې کې اووه د پولیو پېښې یوازې د بلوچستان څخه رامنځته شوي دي.

پاکستان اؤ افغانستان دا مهال د نړۍ هغه یوازیني دوه هیوادونه دي چې تر اوسه پکې د پولیو ناروغي شتون لري اؤ نورې ټولې نړۍ ددې مرض نه ځان خلاص کړی دی.

بنګله دېش کې د ۱۰۵ کسانو له وژل کېدو وروسته کرفیو لګول شوې اؤ پوځ رابلل شوی

په بنګله دېش کې د رامنځته شوؤ تاوجنو حالاتو له امله د دغه هیواد وزیراعظمې شیخ حسینه واجد په ګرد هیواد کې ګرځبندیز یا کرفیو پر ځای کړې اؤ د څو ورځو د پرله پسې احتجاجي مظاهرو وروسته یې پوځ رابللی دی.

د اې ایف پي خبري شبکې د رپورټ له مخې، د بنګله دېش د وزیراعظمې د دفتر نه په خپور شوي یو بیان کې ویل شوي ملک کې د کرفیو پر ځای کولو اؤ پوځ رابللو پرېکړه د د سول انتظامیې د مرستې په خاطر شوې ده.

د شیخ حسینه واجد مطبوعاتي سکتر نعیم الاسلام خان ای ایف پي ته ویلي چې "حکومت د کرفیو پځای کولو اؤ د سویلین چارواکو د مرستې لپاره د پوځ ګمارلو پرېکړه کړې ده".

هغه ویلي دي چې ګرځ بندیز یا کرفیو به سم د واره پر ځای وي.

روانه اوونۍ بنګله دېش کې د طالبعلمانو اؤ پولیسو ترمنځ شوؤ نښتو کې لږ تر لږه ۱۰۵ کسان وژل شوي دي .

ای ایف پي پخپل رپورټ کې وایي چې دا احتجاجونه تر ۱۵ؤ کالو په اقتدار کې له پاتې کېدو وروسته د وزیراعظمې شیخ حسینه واجد د امرانه حکومت لپاره یو اهم چیلنج دی.

تر دې وړاندې پلازمینه ډهاکه کې پولیسو د لا نور اړي ګړي اؤ تشدد د مخنیوي په هڅه کې د یوې ورځې لپاره په ټولو ولسي غونډو بندیز لګولی ؤ.

د پولیسو مشر حبیب الرحمان ویلي وؤ "مونږ نن ډهاکه کې په ټولو لاریونونو، جلوسونو اؤ ولسي غونډو بندیز ولګولو". د هغه وینا وه چې دا ګام ې د ولس د خوندي کولو په خاطر پورته کړی دی.

خو په جلوسونو اؤ غونډو د بندیز اؤ د انټرنیټ د تړلو د اقدام باوجود هم په دوه کروړه ابادۍ لرونکي دغه ښکار کې د پولیسو اؤ مظاهره چیانو تر منځ د نښتو مخه نه وه نیول شوې.

یو پولیس چارواکي د نوم نه ښودلو په شرط ای ایف پي ته ویلي چې احتجاج کوونکو طالبعلمانو د منځني بنګله دېش په نرسنګدي ضلعه کې په یو زندان حمله کړې ده اؤ زندان ته د اور لګولو نه وړاندې یې بندیان خوشې کړي دي.

د هغه وینا وه" ماته د بندیانو شمیره معلومه نه ده خو دا به په سوؤنو کې وي".

د ډهاکه میډیکل کالج هسپتال له مخې د جمعې په ورځ پلازمینه کې لږ تر لږه ۵۲ کسان وژل شوي دي.

د هسپتال د مامورینو لخوا ای ایف ته د ورکړل شوؤ معلوماتو له مخې روانه اوونۍ تر اوسه چې څومره وژنې شوي هغې کې تر نیمایي زیاتې وژنې د پولیسو د ډزو له امله شوي دي.

پښتونخوا اسمبلۍ  د"عزم استحکام"عملیاتو پر ضد قرارداد منظور کړی

د خېبر پښتونخوا اسمبلۍ په ملک کې د ترهګرۍ خلاف د حکومت لخوا د اعلان کړی شوؤ نوؤ پوځي عملیاتو عزم استحکام په ضد قرارداد منظور کړی .

د جمعې په ورځ صوبایي پارلیمان ته دغه قرارداد د قانون صوبایي وزیر افتاب عالم وړاندې کړی چې پکې ویل شوي ګنګوسې کیږي چې د عزم استحکام په ترڅ نوي پوځي عملیات پیل کولی شي.

قرارداد کې ویل شوي چې د عملیاتو نه که هر څومره نقصان کیږي نو ذمه وار به یې وفاق وي.

قردارداد کې غوښتنه شوې ده چې وفاق دې د خېبر پښتونخوا په په اړه له هرې پرېکړې وړاندې باید صوبایي حکومت په اعتماد کې واخلي

ویل شوي چې د تحریک انصاف باني عمران خان له وړاندې څخه واضحه کړې ده چې پوځي عملیات د ستونزې حل نه دی اؤ تر اوسه د عملیاتو کومې زړه پورې نتیجې مخې ته نه دي راغلي.

صوبایي اسمبلۍ په پاکستان تحریک انصاف ګوند د بندیز لګولو د پرېکړې خلاف هم قرارداد وړاندې کړی اؤ د قرارداد په متن کې ویل شوي چې که په یاد ګوند بندیز ولګول شو نو پي ټي آي به یې ضد عدالت ته ځي.

قردارد کې ویل شي چې په پي ټي آي بندیز به د ایین د ارټیکل ۱۷ څخه سرغړونه وي

په دې وروستیو کې د پاکستان حکومت د ترهګرۍ د مخنیوي لپاره د عزم استحکام په نوم د نوؤ پوځي عملیاتو د پېل کولو منطوري ورکړې ده خو په خېبر پښتونخوا کې سیاسي ګوندونو اؤ مدني ټولنې ددې عملیاتو په کلکه مخالفت کړی اؤ د دې په ضد احتجاجونه هم شوي دي.

د امنیت په چارو ژور نظر لرونکی خبریال اؤ څېړونکی داؤد خټک وایي ، دا حقیقت دی چې معاملې په مذاکراتو نه حل کیږي نو بیا پوځي عملیات یوازینۍ لاره پاتې کیږي .

خو هغه وایي چې د طاقت په استعمال سره بیا هم سل په سله پایلې نه شي ترلاسه کیدای.

امریکا غږ اردو سره خبرو کې هغه ویلي چې تر دې وړاندې هم پوځ د ترهګرو په ضد یو شمیر عملیات کړي اؤ په دغو عملیاتو کې د کامیابۍ دعوې هم شوي خو د دغو دعوؤ سر بېره هم ترهګرې ډلې سر راپورته کوي.

هغه وایي پاکستان څخه د ترهګرۍ د نوغي ویستلو لپاره یوه کوټلې اؤ ګټوره تګلاره وجود نه لري.

د داؤد خټک په خبره، که وکتل شي نو په تېرو دوؤ لسیزو کې په باجوړ، مومند، خېبر، اورکزو، کورمه ، جنوبي اؤ شمالي وزیرستان کې ګڼ شمیر عملیات شوي اؤ په دې عملیاتو کې د سیمې خلک ډير زیات اغېرمن شوي هم دي.

نوموړی وایي ددې عملیاتو په نتیجه کې ځایي خلک د خپلو کورونو ، مالونو، څارویو، د بچو د تعلیم اؤ حتی له هر څه محروم شوي همدا لامل دی چې نن د پوځي عملیاتو په ضد غږ پورته کیږي.

داؤد خټک وایي که تېرو وختونو ته نظر واچول شي نو تندروه مشران نیک محمد، بیت الله مسید،حکیم الله مسید، ملا فضل الله، خالد سجنا اؤ داسې نور په امریکایي ډرون بریدونو کې وژل شوي اؤ دا خلک د پاکستان د پوځي عملیاتو نه خوندي وتلي وؤ.

د داؤد خټک په خبره ، همدا لامل دی چې خلک په پوځي عملیاتو پوښتنې راولاړوي

نور کتل

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00
XS
SM
MD
LG