لاس رسیدونکی لینک

Breaking News

پاکستان: د قومي اسمبلۍ په غونډه کې د عدم اعتماد تحریک وړاندې نه شو


د پاکستان د قومي اسمبلۍ غونډه نن د جمعې په ورځ وشوه، خو د واکمنه تحریک انصاف ګوند د مړ شوي غړي دپاره پکې فاتحه وشوه، د وزیراعظم عمران خان پرضد د بې باورۍ د پرېکړې/ عدم اعتماد تحریک پکې وړاندې نه شو او غونډه د ګل/ دوشنبې د ورځې (28مارچ) پورې وځنډول شوه.

د قومي اسمبلۍ سپيکر اسدقېصر وویل، "د قومي اسمبلۍ د رواياتو ترمخه د اسمبلۍ د غړي په مړينه د اېوان کار کردګي ځنډومه، تراوسه پورې د کلونو راهسې دا روايت روان دی، چې د اسمبلۍ د غړي د مړينې وروسته بې د کارروايۍ نه غونډه ځنډول کيږي".

د قامي اسمبلۍ د ننۍ غونډې په اړه ويل شوي وو په 15 نکاتي ايجنډا کې د بې باورۍ پرېکړه شامله وه.

د عمران خان پرضد مخالفه ګوندونو په قامي اسمبلۍ کې د بې باورۍ يا عدم اعتماد تحریک جمع کړی او مخالفه ګوندونو تل عمران خان د سلېکټډ يا خوښ کړی شوي په نوم ياد کړی او تور پرې لګوي چې په ملک کې يې ګراني او بدانتظامي د حسابه سېوا کړې ده، ځکه یې د عمران خان نه د استعفا غوښتنه کړې او د بې باورۍ تحریک يې پرې جمع کړی دی.

خو عمران خان تل د مخالفه ګوندونو مشرانو ته د غلو ټوله ويلي او تور پرې لګوي چې د خپلو غلاګانو د پټولو دپاره د هغه پرضد رايو ځای شوي خو هغه به یې مقابله کوي.

په ننۍ غونډه کې د حکومت وزيران شاه محمود قرېشي، شرين مزاري، اسد عمر، علي محمد خان او نور هم موجود وو.

ورسره د مخالفه ګوندونو د اپوزيشن مشر شهباز شریف، د پاکستان پيپلز ګوند مشر بلاول بټو زرداري او د ياد ګوند شريک چيرمېن پخوانی صدر اصف علي زرداري هم په اسمبلۍ کې وو.

د ځايي میډيا ترمخه د قومي اسمبلۍ سپيکر د ننۍ غونډې دپاره د کلکو امنيتي ګامونو پورته کولو لارښوونه کړې وه.

د غونډې نه وړاندې د پيپلز ګوند شريک مشر اصف علي زرداري ويلي وو، که نن د قومي اسمبلۍ په غونډه کې سپيکر د عدم اعتماد تحریک وړاندې نه کړو، نو دوی به هنګامه کوي.

XS
SM
MD
LG