د پاکستان د قومي اسمبلۍ غونډه نن د خالي، شنبې په ورځ (9 اپرېل) د سپریم کورټ د امر سره سم په لس نيمې بجې پېل شوه، او د غونډې په ايجنډا کې چې د وزيراعظم عمران خان پرضد د بې باورۍ/ عدم اتحاد په تحريک رای ورکول شامل دي، دوه ساعته ځنډ وروسته بيا پېل شوه.
نن د قومي اسمبلۍ د سپيکر اسد قېصر په مشرۍ د قومي اسمبلۍ غونډه سهار په لس بجې پېل شوه او په 11 بجې نوموړي د 12:30 بجو پورې وځنډوله، خو دغه غونډه اوس د دوه ساعته ځنډ وروسته په دوه نيمې بجې بيا پېل شوه.
له دې وړاندې
د قومي اسمبلۍ د غونډې د پېل کېدو وروسته په اسمبلۍ کې د اپوزيشن مشر شهباز شريف وويل، سپيکر ته وايي چې د سپریم کورټ د حکم په رڼا کې اېوان وچلوي.
هغه وويل نن د پارلیمان تاريخي ورځ ده، او پارلیمان په اييني او قانوني طريقې سره سلېکټډ/ خوښ کړی شوي وزيراعظم ته ماتې ورکوي.
شهباز شريف، سپيکر اسد قېصر ته په مخاطب کولو سره وويل، نن د سلېکټډ وزیراعظم په وېنا مه چلېږه.
د اسدقېصر په مشرۍ غونډه کې په حکومتي څوکو د اسمبلۍ د غړو شمېره کمه ليدل کيږي او د مخالفه ګوندونو په څوکو په ګڼ شمېر کې غړي ناست دي.
وروسته چې د بهرنيو چارو وزير شاه محمود قرېشي غونډې ته خپله وېنا پېل کړه، وې ويل، د عدم اعتماد تحریک د اپوزيش حق دی خو مقابله يې کول د حکومت اييني حق دی.
هغه وويل، وزیراعظم د سپريم کورټ فېصله مني خو په فېصله مايوسه دی.
شاه محمود قرېشي په پاکستان کې د ايين د ماتولو يادګېرنه وکړه چې په 1999 کې هم ايين مات شوی وو. او د اوسني حکومت پرضد بهرنی سازش شوی دی.
نوموړي چې وېنا کوله په دغه مهال د اپوزيش څوکيو نه شور شو او سپيکر بیا غونډه وځنډوله.
د پاکستان سپریم کورټ د زیارت، پنجشنبې په ورځ (7 اپرېل) د عمران خان خلاف د عدم اعتماد تحریک د درولو د ډپټي سپیکر (قاسم سوري) امر او د اسمبلۍ د تحلیل کولو دپاره صدارتي حکمنامه مسترد کړې او قومي اسمبلي او د عمران خان حکومت او کابینې د بحال کولو امر يې کړی وو.
سپریم کورټ د عدم اعتماد تحریک ردېدل او د اسمبلۍ ماتېدل غیر اييني ګامونه بللي وو.
سپریم کورټ په خپله فېصله کې دا امر هم کړی وو چې د قومي اسمبلۍ ناسته دې د اپرېل په نهمه، خالي په ورځ، راوبلل شي او د اپرېل د دریمې نېټې خپله دنده دې سر ته ورسوي.
د اپرېل په دریمه نېټه په قومي اسمبلۍ کۍ د عمران خان خلاف د عدم اعتماد په تحریک ووټونه کېدونکي وو چې د اسمبلۍ ډپټي سپیکر دغه تحریک مسترد کړو او وزیراعظم صدر ته خواست وکړو چې اسمبلۍ دې ماتې او نوي انتخابات دې وکړي.
د جمعې په ورځ د تلویزن د لارې قام ته خپله وېنا کې عمران خان وویل د سپریم کورټ فېصله تسلیموي خو هغه وویل پکار ده چې عدالت د اسمبلۍ د غړو وفادارۍ د بدلولو هم خبر اخیستی وی.
