پاکستان ويلي، په افغانستان کې د سېلاب ځپلو دپاره يې مرستې ورکړي او د مرستو لومړۍ الوتکه افغانستان ته رسېدلې ده.
د پاکستان وزیراعظم شهباز شريف په ټويټر ويلي، پاکستان د افغانستان د سېلاب ځپلو د مرستو دپاره ټول ممکنه کوششونه کوي.
"د سېلاب متاثرینو لپاره د پاکستان لومړۍ مرستہ افغانستان ته رسېدلې ده چې له دې وروسته به د نورھم واستول شي. پاکستان به د افغان وروڼو او خویندو تر څنګ ولاړ وي. نور ھیوادونہ دی ھم په دې وخت کې افغانان هیر نکړي".
پاکستان افغانستان ته د سېلاب ځپلو دپاره مرستې په داسې حال کې لېږلي چې په افغانستان کې واکمنو طالبانو پرون په خېراتي او نړيوالو مرستندويه ادارو او هيوادونو د مرستو غږ کړی وو.
په افغانستان کې د پاکستان سفير منصور احمد خان د پاکستان د مرستو په اړه په ټویټر ويلي،
"په افغانستان کې د پاکستان ناظم الامور سېف الله خان د مزار شريف په هوايي اډه د سېلاب ځپلو دپاره مرستې د افغانستان د بېړنيو حالاتو ادارې ته وسپارلې، چې پکې ټېنټونه/ خېمې، خوراکي توکي او دوايانې شامل دي".
هغه ويلي، د افغانستان په لسو/ دولسو صوبو/ ولایتونو کې چې سخت سېلابونه راغلي، ځاني او مالي تاوان يې اړولی، پاکستان د خپلو افغان وړونو، خوېندو دپاره د (سي ون تهرټي) الوتکې مرستې ليږي.
هغه دا هم ويلي، پاکستان به افغانستان ته نورې مرستې ليږي.
د طالبانو د حکومتي شمېرو او رسنيوترمخه د سېلابونو له امله د 29 نه زیات تنه په سېلابونو کې مړه شوي او سلګونه کورونه نړېدلي دي.
د طالبانو د حکومت د بهرنیو چارو د وزارت ویاند عبدالقهار بلخي پرون په ټويټر ويلي،
"د ورستیو سیلابونو له امله د اوښتو درنو ځاني او مالي زیانونو په اړه د تسلیت ترڅنګ له ټولو خیریه بنسټونو، نړیوالو موسساتو او هیوادونو څخه د عاجلو بشري مرستو غوښتنه کوو ترڅو په دې خاصو شرایطو کي د سیلاب ځپلو هیواد والو د سرپنا، خوراک، صحت او زراعت په برخو کي لاس نیوی وشي".
د طالبانو په حکومت کې قدرتي آفتونو ته د رسېدو وزارت ويلي، د مې میاشتې له دویمې نېټې تر ګڼو بارانونو وروسته په پیل شویو سېلابونو کې تر اوسه د افغانستان په دوولسو ولایتونو کې خلکو ته ځاني او مالي تاوانونه اوښتي دي.
د رایټرز خبري ایجنسۍ د رپوټ له مخې سېلابونه په لوېدیځو ولایتونو بادغیس او فاریاب او په شمالي ولایت بغلان کې ډېر زورور وو او زیات خلک یې زیانمن کړي دي.
