د پاکستان وزیراعظم شهباز شريف د ټاکنو د کمېشن [الېکشن کمېشن] نه غوښتنه کړې چې د پاکستان تحريک انصاف [پي ټي ايي] د بهرني فنډ په اړه د اوږدې مودې د ځنډ ښکار فېصله دې زر واوروي.
د پي ټي ايي د بهرني فنډ مقدمه
د پاکستان تحریک انصاف ګوند په جوړونکو غړو کې شامل اکبر اېس بابر چې اوس د دې ګوند غړی نه دی په کال 2014م کې يې الېکشن کمېشن ته خواست کړی وو چې په ګوند کې دننه په پېسو کې غبن (کرپشن) شوی او د بهر نه راتلونکو پېسو کې قوانين غلط کارول شوي دي.
اکبر اېس بابر تور لګولی وو چې پي ټي ايي ته د بهر نه پېسې په غېر قانوني لارو(مني لانډرنګ) راغلي دي.
د اکبر اېس بابر په خبره پي ټي ايي د بهرنيو اف شور کمپنيانو د لارې نزدې 30 لکه ډالره رايو ځای کړي او دا پېسې د غېرقانونه او هنډۍ د لارې پاکستان ته راغوښتل شوي دي.
هغه دا تور هم لګولی وو چې پي ټي ايي ته د بهر هېوادونو نه کومې پېسې راغلي ياد ګوند الېکشن کمېشن ته په جمع کړي کاليز (اډټ) رپوټ کې دا پېسې پټې ساتلي دي.
د تحریک انصاف غبرګون
پي ټي ايي په کال 2019 کې د اکبر اېس بابر د قضيې پرضد اسلام اباد هايکورټ ته خواست کړی وو چې الېکشن کمېشن دې د ګوند د اکاونټونو پلټنې ودروي، خو عدالت دا خواست بيا الېکشن کمېشن ته لېږلی وو.
له دغې وړاندې د کال 2018 د اپرېل په میاشت کې د الېکشن کمېشن مشر د ډايريکټر جنرل په مشرۍ درې کسيزه کميټي جوړه کړی شوې وه چې پي ټي ايي ته د بهر نه ترلاسه کېدونکو پېسو پلټنې وکړي.
ياد ګوند د پلټنو دپاره په سکروټني کمېټۍ هم اعتراضونه کړي وو خو د هغه وخت د الېکشن کمېشن مشر سردار محمد رضا په مشرۍ بنچ دغه اعتراضونه رد کړي او کمېټۍ ته يې د پلټنو دوامداره ساتلو امر کړی وو.
په 30 ورځو کې د فېصلې اورولو فېصله
دا مقدمه چې روانه وه او د پلټنو کمېټۍ پلټنې پوره کړې د روان کال په 14م اپرېل د اسلام اباد هايکورټ جسټس محسن اختر کیاني په 30 ورځو کې د دې فېصلې اورولو حکم کړی وو خو پي ټي ايي بيا د دغه فېصلې پرضد اپيل کړی او د اسلام اباد هايکورټ جسټس اطهر من الله ویلي وو الېکشن کمېشن يوه اييني اداره ده او په 30 ورځو کې يې د فېصلې اورولو حکم معطل کړی وو.
د شهباز شريف غوښتنه
وزیراعظم شهباز شريف نن د نهې/ سه شنبې په ورځ [19 جولايۍ ] د يو ټویټ د لارې د الېکشن کمېشن نه غوښتي چې د پي ټي ایي د بهرنيو پېسو په اړه د اوږدې مودې د ځنډ ښکار فېصله واوروي.
هغه تور لګولی چې عمران نياز ته د اوږدې مودې نه ازاده لار ورکړی شوې او د دې باوجود هغه په ملکي ادارو شرمناکه حملې کوي. هغه ورکړی شوې استثنا ملکي ادارو ته زیان رسولی دی.
د عمران خان په الېکشن کمېشن نيوکې
شهباز شريف دغه غوښتنه په داسې حال کې کړې چې په 17 جولایۍ پي ټي ايي د پنجاب صوبې په ضمني ټاکنو کې په 20 څوکيو کې 15 ګټلي دي او عمران خان بیا د الېکشن کمېشن د مشر نه د استعفا غوښتنه کړې ده.
عمران خان پرون ويلي، د موجوده الېکشن کمېشنر سکندر سلطان راجه په مشرۍ کې سوتره ټاکنې نه شي کېدی، هغه الېکشن کمشنر ته په مخاطب کولو سره ويلي، ته يو جانبداره تن يې او د يو ګوند سره ولاړ يې.
د الېکشن کمېشن ځواب
خو الېکشن کمېشن د عمران خان تورونه رد کړي او ویلي يې دي، دغه تورونه هيڅ حقيقت نه لري او الېکشن کمېشن د ايين او قانون ترمخه خپلې زمه وارۍ پوره کوي.
