لاس رسیدونکی لینک

تازه خبر

پاکستان: په سياسي مقدمو تورنې ادارې نېب د نوي مشر منظوري ورکړی شوې


د پاکستان د کورنيو چارو وزیر ويلي، مرکزي کابينې د احتساب قامي ادارې [نېب] د مشرۍ دپاره د افتاب سلطان د نوم منظوري ورکړې ده، د راپورونو ترمخه تحریک انصاف يې مخالفت کړی دی.

پاکستان کې د نېب په اداره د حکومت مخالفه ګوندونو تل داسې تورونه لګولي چې ياده اداره د مخالفينو پرضد کارول شوې ده.

د لانجمنه او تورونو سره مخ د نېب د مخکني مشر [ر] جسټس جاوېد اقبال په دغه څوکۍ د دندې د مودې پوره کېدو وروسته دا څوکۍ خالي شوې وه.

ويل شوي د نېب د نوي مشر د ټاکنې فېصله د وزیراعظم او اپوزيشن مشر راجه رياض په مشورې سره شوې ده.

د کورنيو چارو وزير رانا ثناالله پرون د زيارت/ پنجشنبې به ورځ [21 جولايۍ] اسلام باد کې يوې خبري غونډې ته ويلي، د نېب د نوي ټاکل شوي مشر افتاب سلطان د تېر وخت ريکارډ ښه دی دوی تمه لري چې هغه به بې د کومه تعصبه د احتساب عمل په وړاندې بوځي.

راپورونه وايي، پاکستان تحریک انصاف ګوند د افتاب سلطان د نېب د مشر په توګه ټاکلو مخالفت کړی او ويلي يې دغه فېصله به په عدالت کې چېلنج کوي.

د نېب نوی مشر څوک دی؟

د نېب نوی ټاکل شوی مشر افتاب سلطان د پنجاب د فېصل اباد سيمې سره تعلق لري، د قانون سره يې لوړې زده کړې يې کړي او د پوليس محکمې څخه یې نوکري پېل کړې وه.

د نوموړي په اړه ويل کيږي په کال 2002 کې چې پخواني پوځي صدر پروېز مشرف رېفرنډم کولو هغه د پنجاب په سرګودها سيمه کې د پوليس په لوړه څوکۍ[ډي ايي جي] په عهده وو او هغه د مشرف د رېفرنډم ملاتړ نه وو کړی او هغه بيا د خپلې څوکۍ څخه لرې کړی شوی وو.

نوموړی د پاکستان مسلم لیګ ن او پاکستان پيپلز پارټۍ په حکومتونو کې دوه ځله د استخباراتي ادارې [انټيليجنس بېورو/ ايي بي] مشر پاتې شوی دی. په 2018 کې هغه د دغه څوکۍ څخه ريټايرډ شوی دی.

که څه هم د افتاب سلطان د پوليس او بيا د ايي بي د مشرۍ په وخت کې کردار ستايل کيږي خو پاکستان تحريک انصاف ګوند پرې د مسلم ليګ ن د ملاتړۍ تور لګوي.

د نېب په اداره تورونه

د نېب اداره چې په کال 1999 کې جوړه شوې، وخت په وخت د تورونو سره مخ پاتې شوې چې دغه اداره حکومتونو دخپلو مخالفينو پرضد د وسيلې په توګه کارولې ده.

د پاکستان سپريم کورټ په کال 2017 کې د نېب د پلي بارګين د قانون په اورېدنه کې جسټس عظمت سعيد شېخ ويلي وو، چې نېب خپل واک په غلطه توګه کاروي او په غبن کولو کې اسانتیاوې برابروي.

د پاکستان تحریک انصاف په حکومت کې تېر کال د مارچ په مياشت کې په ملک کې د الېکټرانک ميډیا د انتظام حکومتي ادارې پېمرا د خبرونو او په روانو چارو د پروګرامونو ټیلې ویژنې چینلو غږ کړی وو چې د احتساب قامې ادارې نیب په اړه دې د ادارې په قول بې اساسه او یو اړخیزې څرګندونو او د ادارې د بدنامولو په اړه خبرونه دې نه خپروي.

هغه وخت د حکومت مخالف سیاسي ګوندونو د څو میاشتو راهسې په نېب نیوکې کولې چې حکومت دغه اداره د مخالفینو پر ضد د وسیلې په توګه کاروي.

په احتساب بیورو د سیاسې مخالفینو په ضد د مقدمو، د بشرې حقونو د خلاف ورزۍ، خلکو د پلټونو په مهال د نیولو او د کردارکشۍ تورونه لګول شوي. خو نېب تل په ځان تنقید رد کړی او خپله دفاع يې کړې ده.

د نېب په مخکني مشر [ر] جسټس جاوېد اقبال چې د بې درکه کسانو دپاره جوړ حکومتي کمېشن مشري هم يې کوله، په هغه هم يو شمېر تورونه لګېدلي خو هغه بيا دغه تورونه رد کړي دي.

پاکستان کې د بشري حقونو کمېشن اېچ ار سي پي په وروستيو کې ویلي، په جاوید اقبال د لګول شوو حېرانونکو تورونو روڼ انده او بې پلوه پلټنې کېدل پکار دي او که چیرې دا تورونه ثابت شول نو باید چې نوموړې د خپلې څوکۍ څخه لرې کړی شى.

په جاوېد اقبال په وروستيو کې د طيبه ګل نومې یوې میرمنې د جنسي ځورونې تورونه لګولي وو.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:59 0:00

Recommended

XS
SM
MD
LG