لاس رسیدونکی لینک

Breaking News

بلوچستان: د پاکستاني پوځ په تباه شوي هيلي کاپټر کې شپږ واړه پوځي افسران مړه شوي


د پاکستان پوځ تاييد کړه چې پرون ماښام په بلوچستان کې د پوځ کوم هيلي کاپټر بې درکه شوی، د هغې ملبه موندل شوې او په هيلي کاپټر کې د لفټننټ جنرال سرفراز علي په ګډون شپږ واړه پوځي افسران مړه شوي دي.

د پاکستان پوځ د پېښې تاييد نن د نهې/سه شنبې په ورځ [دوېم اګست] د هيلي کاپټرد غورځېدو او پکې د پوځي افسرانو مړينې تاييد کړې، چې د هیلي کاپټر ملبه د لسبېلې د وندر په موسی ګوټ سيمه کې ترلاسه شوې ده.

پوځ ويلي، هيلي کاپټر په بلوچستان کې د سېلاب ځپلو په مرستو بوخت وو.

د هيلي کاپټر د غورځېدو د علت په اړه پوځ ويلي، په ابتدايي تحقيقاتو کې مالومه شوې چې هيلي کاپټر د خراب موسم ښکار شوی دی.

د بلوچستان د حب ضلعې د پوليسو يو افسر [ډي اېس پي] يونس رضا نن غرمه وي او اې ډيوه ته د ټیليفون د لارې ویلي وو، چې د پوځي هيلي کاپټر ملبه يې موندلې ده. هغه د پېښې په اړه نور څه نه وویلي.

د هيلي کاپټر د پېښې په اړه چې د پرون راهسې په ټویټر خبرونه خپريږي، او نن کيا بلوڅ نومې خبريال په ټویټر د سرچينو له قوله دعوه کړې چې د هيلي کاپټر د پېښې په شا د بلوڅ بېلتون غوښتونکې وسله والې ډلې لاس دی.

هغه د سرچينو له قوله ويلي، بلوڅ یاغيانو چې هيلي کاپټر په نخښه کړی په دې نه وو خبر چې په دې کې لوړ پوړي پوځي افسران سواره دي.

خو د دغه زمه وارۍ په اړوند د دې خبر خپرېدو پورې نه کومې وسله والې بېلتون غوښتونکې ډلې په خپله زمه واري منلې او نه د پاکستان کومو چارواکو په دغه اړوند څه ويلي دي.

په ياد هيلي کاپټر کې په سورو پوځي افسرانو کې د 12م کور کمانډر يا د کوټې کور کمانډر ليفټنټ جنرل سرفراز علي، ډايريکټر جنرل پاکستان کوسټ ګارډ برګېډير امجد حنیف، د 12کور سي سي انجنېرنګ څانګې بريګيډېر خالد ،پايلټ يا چلونکی مېجر سعيد ، مرستيال چلونکی مېجر طلحه منان او د هيلي کاپټر يو کارمند نايک مدثر فياض شامل وو.

د ځايي خبريالانو او عسکري سرچينو په خبره، جنرل سرفراز تر اوسنۍ پوځي زمه وارۍ وړاندې په بلوچستان کې تر دوه کاله زياته موده د ايف سي ځواک مشر( ایي جي ) هم پاته شوی وو.

له دې وړاندې پرون د ګل/دوشنبې په ماښام [لومړي اګست] د پاکستان پوځ ويلي وو، د پوځ له هيلي کاپټر سره يې رابطه قطع شوې ده.

پوځ ويلي وو، د پاکستان د ارمي ايوېشن هيلي کاپټر کوم چې په لسبيله کې د سيلاب ځپلو په مرسته کې برخه لرله، له هوايي تريفک کنټرول ( اېر ټريفک کنټرول) سره يې رابطه قطع شوې، د 12کور کمانډر په مشرۍ کې شپږ تنه په هيلي کاپټر کې سواره وو.

د پاکستان وزير اعظم شهباز شريف پر خپله ټويټر پاڼه ليکلي وو چې له بلوچستان څخه د پوځي چورلکې ورکېدل د اندېښنې وړ خبره ده. نوموړي نن د پوځي مشر جنرل قمر جاوېد باجوه سره د پېښې په اړه ټيليفوني خبرې هم کړي دي.

د بلوچستان وزير اعلا مير عبدالقدوس بزنجو هم د هيلي کاپټر پر لادرکه کېدو اندېښنه ښودلې ده.

پاکستان کې وخت په وخت د پوځي هيلي کاپټرو او پوځي الوتکو د راغورځېدو پېښې رامنځته کيږي.

د 2021 د دسمبر په میاشت کې په سياچن کې د پاکستان پوځي هيلي کاپټر غورځېدلی، او دواړه پوځي پايلټان پکې مړه شوي وو.

له دغې وړاندې په 2016 کې د خېبرپښتونخوا د هري پور ضلعې د تربيلا سيمې سره نزدې پوځي هيلي کاپټر راغورځيدلی چې پکې يو پوځي افسر وژل شوى او دوه نور ژوبل شوي وو.

او د 2015 په دسمبر کې د خېبرپښتونخوا صوبې په مانسهره ضلع کې د پوځ يو بل هيلي کاپټر غورځېدلی د پينځه پوځي افسرانو (مېجرانو) په ګډون پکې 12 عسکر وژل شوي وو.

پاکستان کې اکثره د پوځي هيلي کاپټرو او الوتکو د غورځېدو علتونه خراب موسم او تکنيکي خرابي يادول کيږي خو د دغو پېښو د پلټنو رپورټونه اکثره مخې ته نه راځي.

د بلوچستان حکومت وياندې فرح عظيم شاه و د پوځي هيلي کاپټر د پرونۍ پېښې په اړه ويلي وو، د دوشنبې په ماښام پر لس منټه لپاسه پينځه بجې د لسبېلې له اوتهل سيمې څخه پرواز کړی مګر له شپږ ساعتونود تېرېدو پس د شپې تر يولس بجو پورې لا هم د کراچۍ و فېصل نومي هوايي ميدان ته نه دی رسېدلی.

په بلوچستان صوبه کې له تېرې يوې مياشتې راهيسې د وسې يا پشکال بارانونو له امله په ټول ايالت کې خونړي سېلابونه راغلي دي.

د افتونو پر وخت مرستندويه ادارې پي ډي ايم اې رپورټ دی چې د روانو بارانونو او سېلابونو له امله په صوبه کې 136 تنه مړه او ډيري ټپيان شوي دي.

د ايالت په سېلاب ځپلو سيمو کې د پي ډي ايم اې ټيمونو تر څنګ ضلعي حکومتونه، ايف سي ځواک او د پاکستان د ارمي عسکر هم د خلکو په ژغورنو او مرسته کې برخه اخلي.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

  • 16x9 Image

    حفیظ الله ستوری شېرانی

    حفیظ الله ستوری شېرانی په بلوچستان کې د وي.او.اې ډیوه د خبریال په توګه کار کوي. هغه له بلوچستان پوهنتون څخه په جرنلزم او پښتو ادبیاتو کې ماسټرۍ کړې دي او له تېرو اوو کلونو راهیسې د جرنلزم په میدان کې کار کوي. شپږ کاله یې د پاکستان له (ډان) ټیلیویژن سره د خبریال په توګه کار کړی او په بېلابېلو ورځپاڼو کې یې کالمونه هم لیکلي دي. په بلوچستان کې د ډیوه رېډیو او ټیلویژن لپاره د ملټي مېډیا په برخه کې پر بېلابېلو سیاسي، کلتوري او ټولنیزو موضوعاتو رپوټونه جوړوي.

     

XS
SM
MD
LG