پاکستانۍ لوبډلې چې تېره شپه د افغانستان نه د کرکټ سيالي ګټلې، په دغه خوشالۍ کې د پېښور په متنو سيمه کې په يوه حجره کې ډزې شوي، پوليس وايي د يو تن په ډزو کې د هغه زوی او بل تن لګېدلي او مړه شوي دي.
بل لور ته د پېښور پولیسو ويلي، د هوايي ډزو په تور کې يې ګڼ کسان نیولي دي.
د پېښور د متنو پوليس تاڼې يو چارواکي ذوالقرنېن وي او اې ډيوه ته تاييد کړه چې تېره شپه د پاکستان او افغانستان د سيالۍ وروسته يو تن په خپله حجره کې په خوشالۍ کې ډزې کولې، چې خپل زوی او بل تن ترې لګېدلي او دواړه مړه شوي دي.
هغه وويل د پېښې مقدمه درج شوې خو څوک پکې نيول شوي نه دي.
د پېښور پوليسو تيره شپه ويلي، چې د پېښور د مختلفو تاڼو په حدودو کې د پاکستان د کرکټ سیالۍ ګټلو په خوشالۍ کې په هوايي ډزو کې ککړ کسان نيول شوي، وسلې ترې ترلاسه کړی شوي او مقدمې پرې درج کړی شوي دي.
په يو ټویټ کې د پېښور کېپټل سيټي پوليس ويلي،
"د پېښور پوليسو د پاک افغان سيالۍ وروسته د هوايي ډزو کوونکو پرضد کارروايۍ کې 26 ملزمان نيول شوي، وسله ترې برامد شوې او مقدمې پرې درج کړی شوي دي".
وروسته په یو بل ټويټ کې ويل شوي د خزانې پوليسو هم څو کسان نيولي چې عکس يې خپور کړی شوي او اته تنه پکې ليدل کيږي چې نيول شوي دي.
د کرکټ سیالۍ نه وړاندې د پښور پوليسو اېس اېس اپرېشن کاشف افتاب عباسي په ټویټر ويلي وو، هوايي ډزې قانونا جرم دی، د پاکستان او افغانستان سيالۍ که هره يوه لوبډله وګټي د هوايي ډزو نه ډډه وکړئ دا خلک وژلی شي.
پاکستان او افغانستان کې اکثره د سيالۍ ګټلو وروسته خلک هوايي ډزې کوي.
تيره شپه د افغانستان او پاکستان ترمنځ د ايشيا کپ سيالۍ نه وړاندې په کابل کې د طالبانو د پوليسو وياند خالد ځدران هم په ټويټر ويلي وو.
د هوايي ډزو دې ډډه وکړی شي ګڼې ډزې کوونکي به د قانوني چلند سره مخ کيږي.
