دافغانستان دپولې ترڅنګ دخېبرپښتونخوا په قبايلي ضلعه جنوبي وزیرستان کې دوه نور مړي موندل شوي چې په ګولیو ویشتل شوي دي.
په وژل شوي کسانو کې یو د پولیس عسکر هم شامل دی.
په جنوبي وزیرستان کې په تیره یوه اوونۍ کې دا دریمه هدفي پیښه ده چې پکې څلور کسان وژل شوي.
پولیس ددې پیښې پخلی کوي او وايي دا مړي دجنوبي وزیرستان مرکز واڼه په بیرمل تحصیل کې د اعظم ورسک تاڼې په حدودو کې موندل شوي.
د علاقې خلک وایي دوی په موټر سایکل کور ته روان وو چې نامعلومه کسانو پرې ډزې وکړې.
د اعظم ورسک تاڼې چارواکو وویل دوي ته اطلاع تر لاسه شوې چې د تانې نه اته کلومیټره لرې او افغان پولې سره جوخت په باغ ناري سیمه کې د دوو کسانو مړي غورځول شوي دي.
د هغوی په وینا د وژل شوؤ کسانو پیژندګلو د صدام دوتاني چې پولیس محکمه کې سپاهي هم دې او د بل د بازو په نوم شوې ده.
د ضلعې د پولیسو دمشر عتیق الله ددفتر چارواکو ډیوه ته وویل ددغو کسانو دوژل کيدو لامل نه دی نامعلوم شوی او پولیس پلټنې پيل کړې دي.
په دې وروستیو کې دخېبرپښتونخوا دنورو سيمو په څیر په قبایلي ضلعه جنوبي وزیرستان کې هم د ناامنۍ پیښې سیوا شوې دي.
دوه ورځې وړاندې هم د جنوبي وزیرستان مرکز واڼه بازار کې دیو تجار تر تښتول کیدو وروسته د هغه مړی په داسې حال کې موندل شوی ؤ چې تشدد او ډزې پرې شوې وې.
تیره اوونۍ د واڼه پریس کلب مخې ته یو تن نامعلومو کسانو په ډزو وژلی ؤ، ویل کیږي دا تن د افغانستان دتیر نظام پرمهال ملي اردو کې افسر و.
دنا امنۍ ددې پیښو پرضد پښتون تحفظ موومنټ سبا واڼه بازار کې احتجاج اعلان کړی. دپښتون ژغورنې غورځنګ مشر منظور پشتین ویلي د امن د غوښتنې دپاره به ولس راټوليږي.
