په اسټريليا کې روان د T20 کرکټ د نړیوال جام په سياليو کې د افغانستان لوبډله نن د شورو/چهارشنبې په ورځ [26 اکتوبر] په خپله دوېمه سيالۍ کې د نيوزي لېنډ د لوبډلې سره مخامخ کیږي.
دا سيالي به د افغانستان په وخت غرمه 12:30 او د پاکستان په وخت يوه بجه پېليږي.
د T20 کرکټ د نړیوال جام د سياليو په ګروپ 1 کې شاملو لوبډلو کې افغانستان خپله لومړۍ سيالي د انګلېنډ سره کړې او انګلېنډ دغه سيالي په پينځه وکټو ګټلې وه.
د افغانستان کرکټ لوبډلې کپتان محمد نبي ويلي، د افغانستان لوبډله په نړیوال جام کې د مخ په وړاندې تلو موقع لري. هغه دغه خبره د امریکا غږ سره په ځانګړې مرکه کې کړې ده.
نوموړي ويلي، د نيوزي لينډ د ننۍ لوبې سره ورته نورې څلور لوبې پاتې دي او د مخکې تلو چانس یې شته.
د افغانستان لوبډله به بله راتلونکې سیالي په 28 اکتوبر د اييرلېنډ سره، په لومړي نومبر د سري لنکا سره او څلورم نومبر د اسټريليا سره کوي.
د T20 کرکټ د نړیوال جام په سياليو کې 12 لوبډلې لوبيږي چې په دوه ډلو وېشل شوي دي.
په ګروپ 1 کې افغانستان، نيوزي لېنډ، اينګلېنډ، سري لنکا، اسټريليا، ايير لېنډ، او ګروپ 2 کې پاکستان، بنګله دېش هند، جنوبي افريقا، زمبابوی او نيدرلېنډ شامل دي.
د روان T20 کرکټ د نړیوال جام فاينل په 13 نومبر په مېلبرن کې ټاکل شوی دی.
