د پاکستان د پنجاب صوبې لاهور هايکورټ د ګورنر پنجاب بلیغ الرحمان امر معطله کړی او وزیراعلا پروېز الهي يې بیرته په ځای کړی او کابينه هم بحال شوې ده.
د عدالت د پينځه ججانو بنچ متفقه فېصله اورولې، او د پروېز الهي لخوا د اعتماد يا باور د ووټ اخستو پورې يې د اسمبلۍ نه ماتولو د بيان حلفي جمع کولو وروسته يې د ګورنر امر معطل کړی دی.
د پنجاب صوبې ګورنر بليغ الرحمان د زيارت/پنجشنبې په ماښام ناوخته امر کړی او د پنجاب صوبې وزیراعلا پروېز الهي يې د څوکۍ څخه لرې کړی او کابينه يې ماته کړې وه.
ګورنر ويلي وو، وزیراعلا ته يې د اعتماد يا باور د ووټ اخستو ويلي خو هغه د خپل ټاکلي وخت پورې ووټ نه دی اخستی ځکه يې د هغه د څوکۍ څخه لرې کولو حکم کړی دی.
د جمعې په ورځ پروېز الهي عدالت ته خواست کړی وو چې د ګورنر حکم دې معطل کړي هغه ویلي چې ګورنر د اعتماد د ووټ اخستو په ځای خط اسپيکر ته لېږلی وو.
د لاهور هايکورټ د فېصلې وروسته د پاکستان تحریک انصاف ګوند فواد چودري ويلي، چې په راتلونکو څو ورځو کې دې د اعتماد ووټ شوق هم پوره کړو.
هغه ويلي عدالت ته يې حلفيه بيان ورکړی چې د راتلونکې اورېدنې پورې به اسمبلي نه ماتوي خو اسمبلي به بيا هم ماتول کيږي.
په پنجاب او خېبرپښتونخوا صوبه کې چې د پاکستان تحریک انصاف ګوند حکومتونه دي، د ياد ګوند مشر او مخکني وزيراعظم عمران خان ویلي وو په 23 دسمبر د اسمبليانو ماتولو نېټه اعلانوي خو پرون يې دغه اعلان نه دی کړی.
راپورونه وايي په پنجاب اسمبلۍ کې مسلم ليګ ن او پيپلز پارټۍ د ګورنر لخوا د وزیراعلا لرې کولو د حکم وروسته دواړو ګوندونو د پروېز الهي په ضد د عدم اعتماد تحریک بیرته اخستی وو.
د مسلم ليګ ن يو غړی خليل طاهر سندهو ویلي، د وزيراعلا خلاف د عدم اعتماد تحریک يې بيرته واخستو خو د اسپيکر او مرستيال سپيکر پرضد يې بيرته نه دی اخستی.
