واشنګټن - د برازیل د پخواني صدر یایئر بولسونارو پلویان چې په انتخاباتو کې یې د بولسونارو ماته نده منلې، د اتوار/یکشنبې په ورځ د برازیل په کانګرس، سپریم کورټ او صدارتي اېوان باندې ورمات شول. تر دې یوه هفته وړاندې د برازیل کین اړخی صدر لویز اېناسیو لولا د خپلې عهدې سوګند پورته کړ.
په سرښار برازیلیا کې د اتوار په ورځ زرګونه احتجاج کوونکي د امنیتي خنډانو نه واوړېدل، او د کانګرس، صدارتي ایوان او سپریم کورټ په چتونو جګ شول او کړکۍ یې ورماتې کړې. ځینو یې د پوځ نه وغوښتل چې مداخلت دې وکړي او بېرته دې بولسونارو په واک اختیار راولي، او یا دې لولا دې سېلوا د صدارتي عهدې نه لېرې کړي.
د ګلوبو نیوز په نوم ټي وي کې احتجاج کوونکي وښودل شول چې په صدارتي ایوان کې ګرځي راګرځي او زیاترو یې د قامي جنډې په څېر زیړ او شنه رنګه جامې اغوستې وې.
د برازیل پخوانی صدر بولسونارو چې د نوي صدر لولا دې سېلوا د سوګند دستورې نه وړاندې امریکا ته تللی دی، تر اوسه یې د اتوار/یکشنبې ورځې د واقعاتو په اړه څه تبصره نده کړې. د هغه درې زامن چې د کانګرس ممبران دي، د هغو په سوشل مېډیا کې هم خاموشي لیدل کیږي.
د مازدیګر د پنځه نیمو بجو شاوخوا داسې ښکاره شو چې د برازیل امنیتي ځواکونو د صدارتي ایوان او سپریم کورټ شاوخوا کنټرول بېرته بحاله کړ، مګر د کانګرس په چت او د ودانۍ شاوخوا یې لا هم زرګونه احتجاج کوونکي پرځای پاته و.
د برازیل دې واقعاتو خلکو ته د ۲۰۲۱ کال د جنوري میاشتې د شپږمې نېټې هغه واقعات ورپه زړه کړل چې د پخواني صدر ډانلډ ټرمپ پلویانو په کانګرس یرغل وکړ. سیاسي څېړونکو دا څو میاشتې خبرداری ورکولو چې دغسې یو یرغل به په برازیل کې هم ممکن ولیدل شي، ځکه بولسونارو د انتخابي نظام په الکټرانیک ووټینګ سیسټم باندې شکونه ښودلي و، مګر هېڅ کوم شواهد یې وړاندې نکړل.
د برازیل د انتخاباتو نتایج هم دننه په هغه ملک کې د مختلفو سیاستمدارانو له خوا قبول وګرځېدل او هم په لسګونو بهرنیو حکومتونو هغه تسلیم کړل.
