د خېبر پښتونخوا په کوهاټ ضلع کې د مسافرو د یو ګاډي (کوچ) او ټرالر په ټکر کېدو له امله 18 کسان مړه شوي دي چې پکې دوه زنانه او دوه ماشومان هم شامل دي.
پولیس وایي دغه پېښه تېر د زيارت/پنجشنبې په ماښام د کوهاټ ضلعې په انډس هایي وې د سورنګ/ټنل سره نزدې شوې ده.
د پوليسو په وېنا د لکي مروت نه پېښور ته تلونکی یو کوچ د یو ټرالر سره ټکر شوی دی.
د ژغورنې ادارې رېسکيو 1122 وایي ټکر دومر شدید شوی چې کوچ په بشپړه توګه تباه شوی دی او د پېښې د ځایی نه د 17 کسانو مړي او یو ژوبل تن په فوري توګه سیمه کې روغتون ته رسول شوي دي.
د کوهاټ د سېول هسپتال چارواکو تايید کړی چې پېښه کې د 16 کسانو مړي او یو تن په ژوبل حالت کې راوړل شوی چې ورسته هغه بيا په روغتون کې ساه ورکړه.
د دوی په وینا په مړو او ژوبلو کسانو کې دوه ښځې او دوه ماشومان هم شامل دي.
د پولیسو په وینا په کوچ کې 18 تنه ناست وو او د ابتدایي مالوماتو له مخې ټکر د ټرالر بریک کار پریښودو له امله شوی دی.
د جنورۍ په 29مه دبلوچستان په لسبېله سیمه کې د مسافرو یو بس له پله لویدلی وو چې د چارواکو په وینا 40 مسافر پکې مړه شوي او څلور نور ژوبل شوي وو.
پاکستان کې وخت په وخت ټريفکي پېښې کيږي چې علتونه د ټرېفک قوانين نه په ځای کول، د ډرايورانو کوتاهي، د پاکستان خراب او تنګ سړکونه او زاړه ګاډي ګڼل کيږي.
