واشنګټن – د امریکا ولسمشر جو بایډن د ګل یا دوشنبې په ورځ وویل، امریکا د ایران "له تکړه ښځو او ټولو شهریانو" سره درېږي چا چې د خپلو "بشري حقونو او بنیادي ازادیو" لپاره په خپلې ژمنتیا، مېړانې او مبارزې نړۍ متاثره کړې.
بایډن د سپینې ماڼۍ لخوا د نوروز د لمانځلو په یوې غونډه کې وویل، امریکا او شریکان به یې "ایراني چارواکي د خپلو خلکو په وړاندې بریدونو کې مسول ګڼلو ته دوام ورکړي."
بایډن همدارنګه د هغو خلکو یادونه هم وکړه چې په ایران او د نړۍ په نورو برخو کې نیول شوي او وویل چې دا یې د ادارې له مهمو لومړیتوبونو څخه دي چې هغوی بېرته خپلو کورونو ته راولي.
بایډن او لومړۍ مېرمنې جېل بایډن د ګل یا دوشنبې وختي په یو بیان کې ویلي و چې "ټولو هغو کسانو ته نیکې هیلې استوي څوک چې په امریکا او نړۍ کې له منځني ختیځ څخه نیولې تر منځنۍ اسیا، کاکسس او اروپا پورې نوروز لمانځي."
ولسمشر بایډن ویلي، "سږ کال نوروز زیاترو کورنیو ته په یو سخت وخت کې راغلی او تر بل هر وخته هیلو ته اړتیا ده، د هغو ښځو په ګدون چې په ایران کې د خپلو بشري حقونو او بنیادي ازادیو لپاره جګړه کوي."
