واشنګټن ــــ په میانمار یا برما کې یو عیني شاهد، د جمهوریت پلوه ډلې یو غړی او ازادې رسنۍ وایي د دې هېواد پوځ د خپلو مخالفینو پر یوه غونډه هوایي بمباري کړې ده چې وایي د ډېرو ماشومانو په ګډون شاوخوا 100 کسان یې وژلي دي.
یوه عیني شاهد اسوسیېټیډ پریس ته ویلي، د نهې- سه شنبې په سهار اته بجې د سیګانګ سیمې په کنبالو ښار کې له پازیګي کلي بهر د اپوزیشن تحریک د ځایي دفتر د پرانیستلو لپاره خلک را غونډ شوي وو چې یوې جنګي الوتکې ورباندې بمونه وغورځول.
عیني شاهد وایي د دې دفتر د پرانيستې مراسمو ته شاوخوا 150 کسان ورغلي وو، چې وايي په وژل شويو کې ښځې، له 20 تر 30 ماشومان او د ځایي پوځي حکومت خلاف د وسلوالو ډلو او نورو اپوزیشن ډلو مشران هم شامل دي.
د میانمار پوځ چې د 2021م کال په فرورۍ کې د آنګ سان سوچي پر منتخب حکومت کودتا وکړه او واک یې تر لاسه کړ له هغه را وروسته اکثر د خپلې واکمنۍ خلاف د وسلوالې مبارزې د مخنیوي لپاره هوايي بریدونه کوي.
یوه عیني شاهد د پوځ له خوا د سزا کېدو له ډاره د نوم نه ښکاره کولو په شرط اسوسیېټیډ پریس ته ویلي، د جنګي الوتکو تر بمبار نیمه ګنټه وروسته یو هیلیکاپټر راغلی او پر دې ځای یې ډزې کړې دي.
په لومړنیو رپوټونو کې د وژل شویو کسانو شمېر شاوخوا 50 ښوول شوی وو، خو وروسته بې طرفه رسنیو وویل چې کېدای شي په پېښه کې د وژل شویو کسانو شمېر نیژدې 100 ته ورسېږي.
دغه عيني شاهد وایي دی د خلکو له ګڼې ګوڼې لږ لرې ولاړ وو چې يو ملګري یې په ټیلیفون د يوې جنګي الوتکې د راتلو په اړه ورته وویل، وایي بیا ده ولیدل چې جیټ الوتکې پر خلکو مخامخ بمونه وغورځول:
"زه نیژدې کندې ته ولوېدم او پټ شوم، یو څو شیبې وروسته چې زه ودرېدم او شاوخوا مې وکتل، خلک ټوټه ټوټه په لوګيو کې مړه پراته وو، د دفتر ودانۍ په اور وسوځېده او تباه شوه".
د ملګرو ملتونو د بشري حقونو د ادارې مشر وولکر ترک په میانمار کې د دې پېښې په اړه اندېښنه ښکاره کړې او په یو بیان کې یې ویلي "سره له دې چې پوځ د مخالفینو خلاف د اقدام کولو په وخت د عامو خلکو د ژغورنې لپاره ښکاره قانوني ذمه وارۍ لري خو په دې پېښه کې د نړیوالو قوانینو د اړوندو ضابطو سرغړونه شوې ده".
د میانمار د پوځي حکومت ویاند مېجر جنرل زاو من تون سرکاري ایم آر ټي وي ته په ټیلیفون منلې چې د اپوزیشن ګوند پر غونډه هوایي برید شوی دی خو تور یې پورې کړ چې حکومت ضد وسلوالې ډلې له تشدده ډک د ترهګرۍ کمپېن تر سره کوي.
د میانمار د اپوزیشن نېشنل یونیټي یا ملي یووالي حکومت په یوه بیان کې خپل پوځ "ترهګر" بللی او وایي دا "وحشیانه عمل" یې د عامو بې ګناه خلکو خلاف د بې توپیره زور د کارولو یو بل مثال او یو "جنګي جرم" دی.
نېشنل یونیټي ګورنمنټ ځان د میانمار قانوني حکومت ګڼي، چې تر کودتا وروسته یې د پوځ خلاف جوړ کړی دی او اکثر پکې د آنګ سان سوچي د ګوند د پارلمان مخکیني غړي دي.
که د دې تازه پېښې مړي تایید شي نو دا په تېرو دوو کلونو کې چې پوځ په میانمار کې واکمن شوی تر ټولو لویه او خونړۍ پېښه ده، د ځینو اندازو له مخې د دې هېواد امنیتي ځواکونو له 2021م کال راهیسې تر 3,000 زیات عام خلک وژلي دي.
یادونه:- د رپوټ ځینې معلومات له اې پي خبري ایجنسۍ اخیستل شوي دي.
