د پاکستان د بهرنيو چارو وزارت ویلي، خارجه وزير بلاول بهټو زرداري به په هند کې ټاکل شوې د شنګهايي همکارۍ سازمان غونډه کې ګډون کوي.
د شنګهايي همکارۍ سازمان [اېس سي او] غونډه د راتلونکې میاشتې مې په څلورمه او پينځمه نېټه هند کې ټاکل شوې ده.
د پاکستان د بهرنیو چارو د وزارت وياندې ممتاز زهرا بلوڅ نن د زيارت په ورځ په اوونيزه خبري غونډه کې وويل، بلاول بهټو زرداری به د پلاوي سره راتلونکې میاشت د هند ګوا ښار ته ځي او په څلورمه او پينځمه مې به د بهرنيو چارو د وزیرانو په غونډه کې ګډون کوي.
هغې وويل، چې اېس سي او د همکارۍ په غونډه کې د ګډون دپاره د هند د بهرنيو چارو وزیر او اېس سي او اوسني چيرمېن اېس جې شنکر پاکستان ته بلنه ورکړې وه.
د بلاول د هند د سفر په اړوند نور جزيات نه دی شريک کړی شوي چې هغه به د سفر په مهال د هندي چارواکو سره ځانګړې ليدنې هم کوي که نه.
بلوڅ زياته کړه، د پاکستان د بهرنيو چارو وزیر بلاول بهټو زرداري تېر کال د جولايۍ په میاشت کې په تاشقند کې په غونډه کې ګډون کړی وو.
د راپورونو ترمخه تازه د بلاول د هند دا سفر به په 12 کاله موده کې د پاکستان د کوم وزير لومړی سفر وي چې د هند سفر به وکړي.
له دې وړاندې په کال 2011م کې د پاکستان د بهرنيو چارو وزيرې حنا رباني کهر د هند سفر کړی وو.
هند چې په اګست 2019 کې د خپل واک لاندې کشمیر خصوصي حيثيت ختم کړی وو، پاکستان د هند دغه ګام غندلی او د نړيوالو قراردادونو سرغړونه یې ورته ویلې وه.
له دغې وروسته د دواړو هېوادونو په لوړه کچه کومې اړیکې نه دي شوي.
د شنګهايي همکارۍ سازمان کې پاکستان، چين، هند، کرغزستان، قازقستان، تاجکستان او ازبکستان شامل دي.
