واشنګټن - د ميډيا د رپورټونو تر مخه د مرکزي حکومت لخوا د عمران خان د ګرفتارۍ خلاف د احتجاجونو له کبله په انټرنټ د نامعلومه وخت پورې بندیز د خلکو ورځنی ژوند ځپلی او په پاکستان کې روان خراب اقتصاد يې نور هم اغېزمن کړی.
د انګرېزۍ ورځپاڼې ډان د سرچينو لخوا رپورټ کړي په تېرو څلورو ورځو کې د احتجاجونو او انټرنیټ د بندیز له کبله انلاين کاروبار 50 فیصده راپرېوتلی او د موبايل سروس ډېټا بنده پرته ده.
کاروباريان وايي د روان سياسي اړي ګړي د لاسه يې کاروبارونه هسې هم بند دي او د انټرنټ د بندېدو سره نور هم اغېزمن شوي.
په مردان کې د ایټالين پیزه منيېجر اسماعيل خان وي او ای ډيوه ته ويلي، د انټرنټ د نشتوالي په وجه يې ارډرز اخیستل او ډيليوري کول ډېر اغېزمن شوي.
هغه وايي د دې سره د موبايل فون کمپنيانې تاواني شوي او حکومت د کروړونو روپو د مالي نه محرومه شوی.
الجزيره په خپل رپورټ کې ويلي ايپس بند دي او عام خلک د انټرنټ نه متاثره شوي. رپورټ وايي د ژوند ډېر کارونه په انټرنټ روان دي او خلک د سوشل ميډيا په بندېدو هم ډېر غصه دي.
دي اکنامکس ټايمز د رپورټ تر مخه د اړي ګړي له سوبه د پاکستانۍ روپۍ د ډالر په مقابل کې ارزښت ډېر کم شوی او د جمعې په ورځ يو امريکايي ډالر د 300 پاکستاني روپو برابر وو چې دا د ملک په تاريخ په وړومبي ځل شوي دي.
د پاکستان د سټېټ بېنک د شمارو ترمخه ملک ته د بهر نه د پيسو لېږلو شرح د تېر کال په نسبت دې کال په اپريل کې نزدې 38 فیصده کمه شوې ده.
د سرکاري شمارو ترمخه په اپريل کې د ملک برامدات د تېر کال په نسبت 26.68 فیصده کم شوي او د انټرنيشنل پيمېنټ ويليو 46 فیصده کمه شوې چې د تېرې اوونۍ د 606 ميلين روپو نه 330 ميلين روپو ته راپرېوتلې ده.
د سيمې خلک او خبريالان وايي د کومو خلکو چې وي پي اين ته لاس رسی وي د هغو خو ګزاره وشي خو د انټرنټ نيشتوالي فري لارنسرز او بهر کاروبار کونکي ډېر اغېزمن کړي چې په لويه کچه يې خلک غصه کړي.
د امريکا د خارجه چارو د وزارت وياند هم په پاکستان کې د انټرنټ په بندېدو په خپله وينا کې ويلي خلکو ته د اظهار د رای ازادي ورکول سوکاله او جمهوري ټولنې جوړوي.
هغه وويل د انټرنټ استعمال د انفارميشن د ازادۍ زريعه ده ځکه چې دا خلک د يو بل سره تړي، خپلې پرېکړې کوي، معلوماتو ته لاس رسی پخپله خوښه لري او حکومتونه ځان ته جواب ده ساتي.
