د هند په لوېدیځ مهاراشټر ریاست کې په سړک دپاسه د مسافرو په یو بس اور لګېدلی چې د ماشومانو په ګډون پکې 25 کسان سوځېدلي اؤ مړه شوي دي.
د رویټرز خبري اژانس د رپورټ له مخې دا پېښه په سمرودهي مهامرګ ایکسپریس وې هغه مهال شوې ده چې دمسافرو نه یو ډک بس د شپې په وخت پونې ته روان ؤ.
هندي رسنۍ وایي د حادثې سره له مخ کېدو وروسته د بس په ټېنکۍ اور ولګېدو چې له امله یې د دریوؤ ماشومانو په ګډون 26 کسان په اور کې وسوځېدل اؤ مړه شول اؤ د دې ترڅنګ اته نور ژوبل شوي دي.
د رسنیو له مخې په دې بس کې ټول 33 کسان سواره وؤ.
ځینو هندي رسنیو د پولیسو له قوله ویلي چې بس په ایکسپریس وې د لګېدلې یوې ستنې سره د ټکر کېدو له امله چپه شوی اؤ بیا پرې اور لګېدلی دی.
پولیسو ویلي د چپه کېدو نه وروسته د بس دروازه بنده شوې وه اؤ مسافر ترې په راوتلو ونه توانېدل ځکه په دومره زیاته شمیره کې کسان د مرګ خولې ته لاړل.
دمهاراشټر مرستیال وزیراعلا دیویندر فډنویس د یو ټویټ له لارې دې پېښه کې د 25کسانو دمړینې اؤ اتوؤ نورو د ژوبلیدو پخلی کړی دی.
د هند وزیراعظم نریندر مودي اؤ د ریاست وزیراعلا ایکنات شندی په دې پېښه د خفګان څرګندونه کړې ده اؤ پېښه کې دمړو شوؤ اؤ ژوبل شوؤ کسانو د کورنیو سره یې دمرستو اعلانونه کړي دي.
