واشنګټن ــــ د پاکستان پولې ته نیژدې د ایران په ناکراره سیستان او بلوچستان ایالت کې وسلوالو د پولیسو پر یوه تاڼه برید کړی دی چې د چارواکو په وینا له څلورو بریدګرو سره سره دوه امنیتي افسران هم پکې وژل شوي دي.
د ایران سرکاري ټیلیویژن د رپوټ له مخې د شنبې- خالي په ورځ په زاهدان ښار کې وسلوالو او ځانمرګو بریدګرو د پولیسو پر یو مرکز برید وکړ، خو وایي پولیسو ورسره نښته پیل کړه.
په رپوټ کې د سیستان بلوچستان د مرستیال ګورنر علي رضا مرهمتي په حواله ویل شوي چې برید کوونکو لاسي بمونه کارولي دي، خو نور تفصیل یې نه دی ورکړی.
د ایران د سیستان بلوچستان صوبې مرکز زاهدان تېر کال هغه وخت د یو شمېر خونړیو احتجاجونو په ډګر بدل شو، چې د مهسا امیني په نوم یوه کردۍ نجلۍ د اخلاقي پولیسو په بند کې مړه شوه او په ضد یې په ټول ایرن کې مظاهرې پیل شوې.
د جیش العدل په نوم وسلوالې ډلې د شنبې- خالي د ورځې د برید ذمه واري پر غاړه اخیستې ده، خو نور معلومات یې نه دي ورکړي چې څو بریدګر وو او نه یې د خپلو بریدګرو د وژل کېدو په اړه د ایراني چارواکو دعوې ته څه جواب ویلی دی.
دې ډلې پر سوشل مېډیا په یو پوسټ کې ویلي ، دا د هغو احتجاج کوونکو غچ وو، چې وایي د 2022 کال د ستمبر پر 30مه د ایران امنیتي ځواکونو وژلي وو.
د رویټرز د خبر له مخې جیش العدل ویلي چې د پولیسو دغه په نخښه شوې تاڼه "په زاهدان کې د جمعې د خونړي ناورین له اصلي ذمه وارو څخه وه."
وسلوالې ډلې لومړی دعوه کړې وه چې د پولیسو مرکز یې قبضه کړی، خو د ایران خبري ایجنسیو ویلي چې بریدګر لومړی په تاڼه کې دننه محاصره شوي او وروسته "ټول څلور ترهګر" وژل شوي دي.
د بشري حقونو لپاره کارکوونکي نړیوال تنظیم ایمنیسټي انټرنېشنل ویلي چې د ایران امنیتي ځواکونو د تېر کال د ستمبر پر 30مه د احتجاج کوونکو د ځپلو په وخت لږ تر لږه 66 کسان وژلي وو.
ایراني چارواکو د ستمبر د 30مې د ډزو د پیلولو پړه پر جیش العدل ور واچوله چې یوه بلوڅ وسلواله ډله ده او تور پورې کوي چې دا ډله په پاکستان کې له خوندي پناه ځایونو په ایران کې د بریدونو لپاره فعالیت کوي.
ایراني چارواکو وروسته د زاهدان د پولیسو کمانډر او د پولیسو تاڼې مشر له دندې ګوښه کړ او د ایران مذهبي مشر آیت الله علي خامنايي زاهدان ته یو پلاوی واستاوه چې د سني بلوڅانو له عالمانو سره خبرې وکړي.
د ایران مشهور سني دیني عالم او پر شیعه مشرانو له اوږدې مودې تنقید کوونکي مولوي عبدالحمید د پولیسو پر مرکز برید غندلی او د سیستان بلوچستان له اوسېدونکو یې غوښتي له داسې کارونو دې ډډه وکړي چې د امنیت د خرابېدو سبب کېږي.
د ایران سیستان بلوچستان یوه غریبه صوبه ده چې له پاکستان او افغانستان سره ګډه پوله لري او اکثر اوسېدونکي یې سني بلوڅان دي.
د بشري حقونو ډلې وايي، بلوڅ اقليت چې شمېر يې دوه ميلينه ته رسېږي، له لسيزو راهيسې له توپیري چلند او جبر سره مخ دي.
یادونه:- د دې رپوټ ځینې معلومات له اسوسیېټیډ پریس او رویټرز خبري ایجنسیو اخیستل شوي دي.
