واشنګټن - د شام د پایتخت، دمشق په مضافاتو کې، د شیعه ګانو یو زیارت سره څېرمه د عاشورا نه یوه ورځ وړاندې، پرون د زیارت/پنجشنبې په ورځ چاودنه وشوه چې له امله یې لږ تر لږه شپږ تنان مړه او په لسهاوو نور تنان زخمیان شوي دي.
د شام سرکاري رسنیو د داخله وزارت له قوله ویلي چې دا چاودنه په یو ټېکسي ګاډي کې د ځای پرځای شوو بارودو د له امله په سیده زینب سیمه کې شوې ده.
د الاخباریه په نوم سرکاري ټي وي چېنل او د شام خبري ادارې ویلي چې د هغه ملک د صحت وزیر حسن الغباش په پېښه کې د زخمي شوو کسانو له ډلې څخه، شپږویشت (26) تنان یې هسپتال ته رسول شوي دي.
په برطانیه کې د شام په بشري حقونو نظرساتونکې ادارې ویلي چې په پرونۍ چاودنه کې یوه ښځه هم وژلی شوې چې درې ماشومان یې زخمیان دي. ادارې دا هم ویلي چې چاودنه د ایراني ملېشو یو مرکز سره نږدې شوې ده. ایران د شام په خانه جنګۍ کې د صدر بشار الاسد ملاتړي پاته شوي دي.
سږکال د عاشورا ورځې نه مخکې، د دمشق په سیده زینب علاقه کې دا دویمه چاودنه وه. د نهې/سې شنبې په ورځ هم د شام سرکاري رسنیو د یو پولیس چارواکي له قوله خبر ورکړ چې یو موټرسایکل چلوونکي د ځان سره بارودي مواد په هغه سیمه کې وچاودل او دوه عام کسان په کې زخمیان شول.
