پاکستان کې د نګران وزیراعظم تر ټاکل کېدو یوه ورځ وروسته د تېلو بیعې لوړې کړل شوې

په پاکستان کې له نګران وزیراعظم ټاکل کېدو نه یوه ورځ وروسته د تېلو بیعې خېژول شوي دي‌ اؤ په دې کې د یو لیټر په سر تر 20 روپو اضافه راوستل شوې ده.

د خزانې وزارت له لوري تېره شپه د پټرولو په نرخ کې د یو لیټر په سر د 17 روپو اؤ 20 پیسو اؤ د ډیزلو په نرخ کې د 20 روپو اضافه اعلان کړل شوې ده.

د پاکستان د خزانې وزارت پخپله اعلامیه کې ویلي دي چې په نړیوال مارکیټ کې د تیلو بیعې لوړې شوې دي نو ځکه پاکستان کې هم دتیلو نرخونه وخیژولی شول.

دخزانې وزارت له مخې ددې نوې اضافې له امله اوس په پاکستان کې د پټرولو د یو لیټر نرخ 290 روپو اؤ 45 پیسو ته لوړ شوی اؤ ډیزل یو لیټر په 293 روپو اؤ 40 پیسو پلورل کیږي.

تر دې وړاندې د اګست په وړومبۍ نېټه هم حکومت د پټرولو په نرخ کې د یو لیټر په سر 19 روپۍ اؤ 95 پیسې اؤ د ډيزلو نرخ کې 19 روپۍ اؤ 90 پیسې اضافه کړې وه.

د تېلو په نرخونو کې د دې اضافې د اعلان په مهال د خزانې پخواني وزیر اسحاق ډار ویلي وؤ چې په تېرو دوؤ اوونیو کې په نړیوال مارکیټ کې د تېلو بیعې زیاتې لوړې شوې دي اؤ په 16جولایي چې د هایي سپيډ ډیزلو د یو بېرل نرخ 96 ډالر ؤ په 31 جولایي دا 111 اعشاریه 46 ډالرو ته رسیدلی دی.

هغه ویلي وؤ همداشان په دې موده کې د پټرولو د یو بېرل بیعه 89.14 نه 97.39 ډالر ته لوړه شوې ده.

د پاکستان وتلي خبریال کامران خان په ټویټر (ایکس) رسنۍ لیکلي د آی ایم ایف د شرط په اساس پاکستان د وړاندې نه هم د تېلو بیعې لوړې کړې دي اؤ د راتلونکې میاشتې نه به د بجلۍ بِل هم د 23 فیصدو نه تر 27 فیصدو لوړ شي.

د پښتونخوا خبریال رفعت الله اورکزي د تېلو بیعو کې لوړوالی د نګران وزیراعظم انوار الحق کاکړ دحکومت وړومبی ګزار بللی دی اؤ په ایکس( پخواني ټویټر) یې پوښتنه کړې ده چې هرلکه دپټرولو د یو لیټر نرخ دریوؤ سوؤ روپو ته ورسیږي نو د ملک سقوط نور څنګه وي؟

د مارچ په میاشت کې دپاکستان پټروليم ډويژن ویلي وؤ د پټروليم ليوي مرکزي ټېکس په مد کې ملک ته د 175 اربه روپو تاوان اوړي او په دې کې د روان مالي کال په اووه مياشتو کې 20 فيصده کمی شوی دی نو ځکه دتېلو بیعې به لوړولی شي.

پټروليم ليوي د مرکزي حکومت لخوا د تېلو په مصنوعاتو [پټرولو او ډيزلو] ټېکس اخستل کيږي او دا ټېکس نېغ په نېغه د مرکزي حکومت خزانې ته ځي صوبو ته پکې برخه نه ورکول کيږي.