لاس رسیدونکی لینک

تازه خبر

د عمران خان د سزا ځنډولو د خواست اورېدنه د اګست 28مې ته ځنډول شوې ده


اسلام اباد هایکورټ د پخواني وزیراعظم عمران خان د سزا ځنډولو د خواست اورېدنه د ګل یا دوشنبې ورځې ته ځنډولې ده چې په دې د عمران خان وکیلانو دعدالت په خونه کې احتجاج کړی اؤ د "شرم شرم" نعرې یې وهلې دي.

د اسلام اباد هایکورټ د چیف جسټس عامر فاروق په مشرۍ دوه کسیزې ډلې د جمعې په ورځ د عمران خان د سزا ځنډولو د خواست اورېدنه کړې ده اؤ داسې انګیرل کېده چې ښایي نن هایکورټ د عمران خان د درې کلن بند سزا وځنډوي اؤ د خوشې کولو امر یې وکړي.

په نننۍ اورېدنه کې د الیکشن کمیشن وکیل امجد پرویز ایډوکیټ د ناروغۍ په دلیل عدالت ته نه ؤ وړاندې شوی اؤ خپل مرستیال وکیل یې عدالت ته ورلېږلی ؤ.

د اوریدنې په مهال چیف جسټس امر فاروق وویل، د سزا د ځنډولو خواست په مهم پړاؤ کې دی اؤ که چرې وکیل امجد پرویز محکمې ته حاضر شوی و نو د 15 نه نیولی په 20 دقیقو یا منټونو کې به دلیلونه سرته رسیدلي وؤ.

دالیکشن کمیشن مرستیال وکیل عدالت ته ویلي امجد پرویز ناروغه دی اؤ ډاکټر ورته د ارام کولو وړاندیز کړی دی ځکه نو عدالت باید د سزا ځنډولو د خواست اورېدنه د اګست تر 28مې پورې وځنډوي.

د عمران خان وکیل لطیف کهوسه د خواست اورېدنې د ځنډولو په غوښتنه نیوکه وکړه اؤ ويې ویل "یو تن د تېرو 20 ورځو نه په زندان کې پروت دی" .

چیف جسټس عامر فاروق د لطیف کهوسه په دغه نیوکه وویل ټرایل کورټ چې څه کړي دي غلط یې کړي دي، دا د یو شخص د بنیادي حقونو معامله ده.

د اسلام اباد ضلعي عدالت یا سیشن کورټ عمران خان ته د توشه خانې په قضیه کې د درې کاله بند سزا اورولې ده اؤ هغه دا مهال په اټک زندان کې دخپل بند شپې ورځې لنډوي.

تحریک انصاف ګوند ددې سزا د ځنډولو په ضد اسلام اباد هایکورټ ته خواست کړی دی اؤ دریځ یې خپل کړی چې د سېشن کورټ جج دعمران خان پرضد فیصله کې د تعصب نه کار اخستی اؤ د انصاف تقاضې یې نه دي پوره کړي.

نن د خواست اورېدنې په مهال داسلام اباد هایکورټ چیف جسټس ویلي دي "مونږ د سزا ځنډولو د خواست اورېدنه د ګل د ورځې پورې ځنډوؤ اؤ که څوک رانغلل نو هم به فیصله وکړو".

د عمران خان وکیل لطیف کهوسه له عدالته پوښتنه وکړه چې "د تحریک انصاف ګوند مشر به درې ورځې نور هم په زندان کې ساتئ ؟"

لطیف کهوسه ویلي د ګل- دوشنبې په ورځ به بیا دی عدالت ته نه ورځي اؤ جج ته یې ویلي "ستا چې څه خوښه وي هغه وکړه".

چیف جسټس ویلي د جمعې په ورځ ډیویژن بینچ نه ؤ خو بیا هم هغوي نن دلته اوریدنه کوي .

هغه ویلي په تېره اوریدنه کې یې هم د دې قضیې اوریدنه د ګل تر ورځې ځنډولی شوه خو داسې یې ونه کړل. د هغه وینا وه چې دوي هم د ټرایل کورټ په څېر کار کولی شي خو داسې نه کوي.

د خواست اوریدنې تر ځنډول کیدو وروسته د عدالت په خونه کې موجودو وکیلانو د شرم شریم نعرې وهلې دي اؤ ویلي‌ یې دي چې دا "فکسډ میچ دی"، له دې خبرې یې مقصد دا وو چې ګنې سودا شوې ده.

Forum

بي بي شیرینه

بي بي شیرینه – په ټیلې ویژن
please wait

No media source currently available

0:00 2:59:59 0:00

Recommended

XS
SM
MD
LG