په افریقه کې د امریکا پوځي کمانډ ویلي دي چې د الشباب تندلارو په ضد یې په صومالي کې "دفاعي" فضایي حمله کړې چې په کې د نوموړې ډلې دیارلس تندلاري وژل شوي دي.
دغه بمباري د شنبې/خالي په ورځ، د صومالي د سییرا ښار ته څېرمه ترسره شوې چې د کېسمایو نه 45 کلومټره لېرې، شمال لویدیځ پلو پروت دی.
په افریقه کې د امریکا پوځي کمانډ (افریکام) ویلي دي چې دا حمله یې د صومالي د ځواکونو په ملاتړ ترسره کړې، کوم چې د الشباب ډلې د جګړه مارانو سره په جنګ کې وو.
د افریکام په بیان کې ویل شوي: "د صومالي له نشنل پوځ سره په همکارۍ، په افریقه کې د امریکا د پوځ کمانډ ابتدايي اندازه دا ده چې په دغه فضایي بمبارۍ کې د الشباب 13 جګړه ماران وژل شوي او هېڅ کوم سېویلین نه وژل شوی او نه هم زخمي شوی دی."
بیان کي دا هم راغلي چې د دې عملیاتو د پوره نتیجو د موندلو دپاره به ارزونه دوام ولري او که مناسب وي، نو اضافي معلومات به د مطبوعاتو سره شریک کړی شي، مګر "په حمله کې د شاملو یونټونو او استعمال شوو وسایلو په اړه ځانګړي جزئیات به ښکاره نه کړی شي ځکه دا یقیني کول دي چې عملیات امن پاته شي."
امریکا د الشباب ډله، د القاعده ډلې تر ټولو ستره او فعاله ډله په نړۍ کې شمېري. الشباب په کال 2012 کې د القاعده سره یوځای شوه.
د افریکام د بیان ترمخه، د الشباب ډلې "هم خپل عزم او هم خپل صلاحیت په اثبات رسولی چې کولی شي د امریکا ځواکونو او شریکانو باندې یې حمله وکړي او په خطه کې د امن مفاداتو ته خطره پېښه کړي."
په همدې حال کې امنیتي ذرائعو وي او اې ته ویلي دي چې د خالي/شنبې ورځې په سهار، د الشباب تندلارو د صومالي په مرکزي صوبه جلمدج کې په یو کلي باندې چې په دې وروستو کې آزاد کی شوی و، بیا حمله کړې او حکومتي عسکر یې وژلي دي.
Forum