لاس رسیدونکی لینک

تازه خبر

په شام کې د امریکا په ملاتړ کردي ځواکونو او یوې ځایي ډلې تر منځ جګړه کې 28 کسان وژل شوي


رپوټونه وایي د شام په ختیځ کې د امریکې په ملاتړ د کردي جنګیالو په مشرۍ د ډیموکرېټیک ځواک او په دې هېواد کې د یوې ځایي ډلې تر منځ جګړه شوې ده چې پکې لږ تر لږه 28 کسان وژل شوي دي.

ځایي رسنۍ وایي‌ جګړه د شام په ختیځ صوبې دیر الزور کې د تېرې دوشنبې- ګل په ورځ هغه وخت پیل شو چې شامي ډیموکرېټیک ځواک د "مجرمو عناصرو" په ضد کمپېن پیل کړ.

شامي ځواک مجرم عناصر د دیر الزور صوبې په پوځي شورا کې ځینې هغه مشران بللي چې له دوی سره ځایي تړاو لري.

جګړه د دې ناارامه صوبې څو هغو ښارونو او کلیو ته هم غزېدلې ده چې داعش ترهګره ډله پکې له 2014م تر 2019م کال پورې واکمنه وه او بیا د امریکې په مشرۍ نړیوال اتحاد له دې ځایه وشړله.

په برتانيا کې د شام د بشري حقونو د څار ډله چې په خپل هېواد کې څېړونکي لري وايي، د دير الزور په جګړه کې د دواړو جنګېدو ډلو تر 28 ډېر کسان وژل شوي او ګڼ شمېر نور ټپيان شوي دي.

په ایس ډي ایف ځواک کې د پیپلز پروټکشن یونټ د رسنیو د څانګې مشر سیامند علي وي او اې ته ویلي چې په وژل شویو کسانو کې د شامي ځواک پینځه جنګیالي شامل دي. هغه وويل:

"د دې کمپېن مقصد په دير الزور کې د امن ټينګول دي ځکه چې په دغه صوبه کې ناارامي په زیاتېدو ده او له بده مرغه د ځايي پوځي شورا ځينې عناصر شته چې په دې ناارامۍ کې مرسته کوي."

شامي ځواکونو د چارشنبې- شورو په ورځ په یوه بیان کې ویلي چې دوی د دیر الزور پوځي کونسل کمانډر احمد الخبیل چې په ابو خاوله مشهور دی له خپلې څوکۍ لرې کړی دی.

ایس ډي ایف ویلي ابو خاوله او د ځایي کونسل څلور نور مشران له دې کبله له دندې لرې کړل شوی چې وایي په ډېرو جرمونو او سرغړونو لکه "د نشه یي موادو په قاچاق او د امنیتي حالاتو په ناسم انتظام" کې یې لاس درلود.

د امریکې په ملاتړ ایس ډي ایف ځواک ویلي ابو خاوله "له انقلاب دښمنو بهرنیو ادارو سره اړیکې لرلې او ورسره په همږغۍ کې وو"، چې اشاره یې د شام حکومت او د ایران ملاتړو ملېشو ته ده.

ایس ډي ایف د کردانو په مشرۍ اتحاد دی چې د داعش وسلوالو خلاف جګړه کې د امریکې شریک دی. دې ډلې او د دې ځایي ملګرو اوس د ډېرو هغو سیمو کنټرول تر لاسه کړی دی چې یو وخت د داعش په کنټرول کې وې.

د امریکې د پوځي چارواکو په وینا دا مهال د نړیوال اتحاد د یوې برخې په توګه په سیمه کې د امریکې 900 پوځیان دي چې له ایس ډي ایف سره د داعش په ضد عملیاتو کې مرسته او مشوره کوي.

Forum

ځانګړې ویډیوګانې

بي بي شیرینه

بي بي شیرینه: په ټیلې ویژن
please wait

No media source currently available

0:00 1:59:59 0:00

Recommended

XS
SM
MD
LG