لاس رسیدونکی لینک

تازه خبر

په هند کې د G20 غونډې ته صدر بایډن ځي خو د چین او روس ولسمشران پکې ګډون نه کوي


د امریکې د ولسمشر جو بایډن په ګډون د نړۍ د ګڼ شمېر هېوادونو مشران په هندوستان کې د سترو اقتصادي قوتونو د نړیوال تنظیم G20 په غونډه کې ګډون کوي، خو د روس او چین ولسمشران دې غونډې ته نه ورځي.

سپینې ماڼۍ د سه شنبې- نهې په ورځ ویلي، صدر جو بایډن له داسې سترو هدفونو او لوړو هیلو سره د G20 هېوادونو سرمشریزې ته ورځي چې د 20 مخکښو شتمنو او پرمختللو هیوادونو تنظیم به پر مهمو نړیوالو مسئلو ګډ کار وکړي.

دې سرمشریزې ته د ښاغلي بایډن د ورتګ اعلان په داسې وخت شوی چې تر دې یوه ورځ مخکې یې د ژوند ملګرې او د امریکا لومړۍ مېرمن جيل بایډن ته کورونا وایرس ور پورې شوی او د ده د روغتیا په اړه یې هم شکونه را پورته کړي.

خو د سپینې ماڼۍ ویاندې کېرین جیان پېر وویل، "هغه [د کورونا] نخښې نه لري" او زیاتوي چې د نهې- سه شنبې په ورځ د هغه د طبي معایناتو نتیجه منفي وه او وايي بیا به یې هم ټیسټ کېږي خو دا یې ونه ویل چې که هند ته د پنجشنبې- زیارت په ورځ تر تګ مخکې کورونا ور پورې شوې وه نو بیا به یې پلان څه وي.

د امریکې د ملي امنیت سلاکار جېک سولیوین وایي، انتظامیه به یې د هند په غونډه کې موسمي بدلون، د پورونو بیا جوړښت او په اوکراین کې د جګړې په څېر مسئلو ته پاملرنه کوي:

"هیله لرو د G20 دا سرمشریزه به وښيي چې د نړۍ لوی اقتصادونه په چېلنجونو کې هم ګډ کار کولای شي، موږ نوي ډیلي ته ځو او زموږ پام به پرمختلونکو هیوادونو ته ګټه رسول او د امریکې د خلکو لپاره له موسمي بدلونه تر ټیکنالوجۍ پورې د بنیادي لومړیتوبونو په برخه کې پرمختګ وي".

د هندوستان د بهرنیو چارو وزیر ایس جې شنکر وایي، د جي ټوینټي هېوادونو په غونډه کې د روس او چین د ولسمشرانو د ګډون نه کولو پرېکړه له هند سره هیڅ کار نه لري.

د هند له اې این ای خبري ایجنسۍ سره د شورو- چارشنبې په ورځ په مرکه کې ښاغلي شنکر ویلي، چې په د ستمبر د نهمې او لسمې په سرمشریزه کې د چین د صدر شي جینپینګ او د روس د صدر ولادیمیر پوټین د نه ګډون پرېکړه کوم غیرمعمولي اقدام نه دی:

"زه فکر کوم هغوی چې هره فیصله کوي په دې باندې دوی په خپله ښه پوهېږي، د نه راتګ وجه یې چې هر څه وي خو د دغو هېوادونو په استازیتوب چې څوک ګډون کوي دا د هغوی عکاسي کوي".

د جې شنکر په وینا د G20 هېوادونو مشران په دې اړه مذاکرات کوي چې په دې غونډه کې پر مسایلو باندې کوم حتمي تړون ته سره ورسېږي.

که څه هم دې غونډې ته د چین او روس ولسمشران نه ورځي، خو د روس د بهرنیو چارو وزیر سرګي لاورو او د چین وزیراعظم لي چیانګ به پکې د خپلو هېوادونو له پلاویو سره ګډون کوي.

ټاکل شوې چې په دې غونډه کې به د امریکې، برتانیې، فرانس، جرمني، کېنېډا او اسټرېلیا په ګډون په دې ستر اقتصادي تنظیم کې د شاملو هېوادونو مشران برخه اخلي او پر بېلابېلو مسایلو به خبرې کوي.

د صدر پوټین او صدر شي جینپینګ نه ګډون به د غونډې پر ګډه اعلامیه څه اغېز ولري، جې شنکر د دې پوښتنې په جواب کې وویل، دوی لا تر اوسه په مذاکراتو اخته دي او له دې غونډې ډېرې هیلې لري.

ښاغلي جې شنکر وایي د کورونا وبا د اغېزو، موسمي بدلون، شخړو، سیاست او نړیوالو پورونو غوندې مسایلو په شته والي کې هندوستان له بېخي ستونځمنې نړۍ سره د کار کولو چېلنج ور له غاړې دی.

د اوکراین او روس د جګړې په اړه هم د G20 هېوادونو رایې سره وېشلې دي. روس او چین وایي په اوکراین کې د روانې جګړې ذمه واري پر ماسکو نه شي اچول کېدای.

خو امریکا، فرانس، برتانیا، کېنېډا او نورو لوېدیځ هېوادونه نه یواځې پر اوکراین د روس د یرغل غندنه کوي، بلکې له دې هېواد سره د خپلې دفاع لپاره پرله پسې پوځي مرستې کوي.

د نړۍ په درو کې دوې برخې ابادي د G20 په غړو هېوادونو کې ده او دغه هېوادونه د نړۍ د جي ډي پي یعنې مجموعي پیداوار 85 فیصده برخه جوړوي او په نړیوال تجارت کې د دغو هېوادونو برخه 75 فیصده ده.

د رویټرز د خبر له مخې له څواړخیزو ادارو څخه د پورونو اخیستل، د پورونو په نړیوال نظام کې اصلاحات، د کرپټو کرنسۍ لپاره اصول ټاکل او د جغرافیایي او سیاسي شخړو له کبله ناڅرګند حالت د G20 په ایجنډا کې شامل دي.

یادونه:- په دې رپوټ کې د رویټرز او د وي او اې د واټ هاوس د خبریالې انیتا پاول معلومات کارول شوي‌ دي.

Forum

ځانګړې ویډیوګانې

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:58 0:00

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:58 0:00

Recommended

XS
SM
MD
LG