امریکا د قره باغ سیمې ارمېني وګړو دپاره د بېړنۍ مرستې اعلان کړی او له آذربایجان نه یې هلته کې اړو کسانو ته د انساني امداد رسولو په برخه کې د همکارۍ غوښتنه کړې ده.
د دې ترڅنګ، د امریکا د نړېوالې ترقیاتي ادارې مشرې سمنټا پاور ویلي دي چې د اذربایجان له طرفه د زور استعمال غیرقابل قبول دی او واشنګټن ورته د یو مناسب جواب په لټه کې دی.
د امریکا د نړېوالې ترقیاتې ادارې یا USAID مشره سمنټا پاور د یو پلاوي په مشرۍ ارمېنیا ته ولاړه او د دې ترڅنګ چې په ناګورنو قره باغ کې یې حالات پرېشان کن وبلل، د هغه ځای ارمېنیانو ته یې د یوولس نېم (۱۱.۵) مېلینه ډالرو مرستې اعلان وکړ.
مېرمن پاور د نهې/سې شنبې په ورځ له آذربایجانه وغوښتل چې د بشري مرستو په رسولو کې سهولیات برابر کړي.
هغه په پایتخت یروان کې خبریالانو ته وویل: «تر هرڅه دمخه، مونږ په آذربایجان غږ کوو چې د ډزبندۍ خیال دې وساتي او په ناګورنو قره باغ کې دې د سېوېلین خلکو د حقونو تحفظ دپاره کلک ګامونه اوچت کړي. صدر علی يف د ارمېني نسله وګړو د حقونو د تحفظ وعده کړې ده. آذربایجان ته په کار ده چې په دې وعدې اودرېږي.»
تر دې وړاندې، ارمېنیا ته د رسېدو وروستو، سمنټا پاور او ورسره پلاوی یې چې د امریکې خارجه وزارت چارواکي هم په کې شامله و، د ګل/دوشنبې په ورځ د ارمېنیا له وزیراعظم نیکول پاشینیان سره وکتل او د صدر جو بایډن یو خط یې وروسپاره.
وزیراعظم پاشېنیان په دې لیدنه کې دعوه وکړه چې ګني په ناګورنو قره باغ کې نسل وژنه روانه ده. هغه وویل: «اوس دستي په ناګورنو قره باغ کې د ارمېنیانو نسل وژنه کیږي، دا کار همدا اوس روان دی. او دا ډېره د بدقسمتۍ خبره ده، ځکه مونږ دمخه لا په دې اړه کوشش کولو چې نړېواله برادري ورته متوجه کړو.»
که څه هم ارمېنیا د قره باغ د تازه صورتحال په حوالې سره، روس ملامته کړی، مګر روس ویلي چې نیکول پاشېنیان دې صرف ځان ملامته وګڼي، ځکه د ماسکو په باور، ارمېنیا د دې پر ځای چې د امن دپاره د اذربایجان او روس سره کار وکړي، له مغربي ملکونو سره یې د یارانې کوښښونه شروع کړل.
په ناګورنو قره باغ کې شاوخوا یو لک و شل زره ارمېنیان اوسېدل چې د دیارلس زرو نه زیات یې په تېرو دوه درې ورځو کې ارمېنیا ته اوړېدلي او د ګاډو کتارونه لا هم ارمېنیا ته روان دي.
ناگورنو قره باغ پخوا د آذربایجان په اختیار کې نه وه، مګر اوس مهال په عالمي کچه د آذربایجان خاوره پېژندل کیږي.
د ۱۹۹۰مو کلونو په پیل کې چې د پخواني شوروي اتحاد د ټوټه کېدو نه پس سیمه کې جنګ وشو، نو له هغه وخته راهیسي قره باغ سیمه د یوې بېلتون غوښتونکې انتظامیې لخوا اداره کړی شوې ده.
تېره هفته د آذربایجان پوځ په هغې علاقې کې یوه شپه و ورځ پوځي عملیات ترسره کړل او د سیمې ارمېنیان یې دې ته مجبوره کړل چې سوله وکړي او ډزبندي ته غاړه کیږدي.
Forum