بلوچستان: تربت کې د وسله والو په ډزو شپږ مزدوران وژل شوي، دوه ژوبل

تر پېښې وروسته وسله وال تښتېدلي اؤ په ډزو کې د وژل شوو مزدورانو جسدونه اؤ اؤ ژوبل کسان د سیمې هسپتال ته رسول شوي دي.

په سمدستي توګه ددې پېښې ذمه واري چا په غاړه نه ده اخستې.

د پلوچستان نګران وزیراعظم انوار ا لحق کاکړ دا برید غندلی او پر ایکس [مخکیني ټویټر] یې په پېښه کې د وژل شویو کسانو له کورنیو سره خواخوږي ښکاره کړې ده. کاکړ لیکلي:

"په تربت کې په بې ګناه مزدورانو د ترهګریز برید په اړه په ژوره خواشینۍ سره خبر شوم. موږ د دغه ناوړه عمل غندنه کوو او د ترهګرۍ خلاف سره متحد یو".

د بلوچستان بیلابیلو سیمو کې تر دې وړاندې هم وخت په وخت د وسله والو لخوا مزدوران اؤ امنیتي ځواکونه په نخښه کړل شوي چې دغو پېښو کې د زیاترو ذمه واري بیلتون خوښه بلوڅ وسله والې ډلې یا هم تحریک طالبان پاکستان پر غاړه اخستې ده .

څیړونکي وايي دا بریدونو څرګندوي چې وسله وال د تیر په پرتله دپاکستان خېبر پښتونخوا اؤ بلوچستان صوبو کې نور منظم هم شوي او د بریدونو صلاحیت یې سیوا شوی دی.

پاکستان کې د څېړنو او امنیتي مطالعاتو مرکز (CRSS) د ملک د امنیتي حالاتو په حوالې سره پخپل یو تازه رپورټ کې ویلي، سږ کال په ټول هیواد کې دترهګرۍ 1,087 پیښې مخې ته راغلې دي.

په رپوټ کې ویل شوي چې په دغو پېښو کې 36 فیصدي بریدونه پر امنیتي ځواکونو شوي او دا په تېرو اتوو کلونو کې د ترهګریزو بریدونو تر ټولو لوړه شرحه ده.

په رپورټ کې ویل شوي، په تېرو درېو میاشتو کې د تندروۍ په شویو پیښو کې 58 فیصده عام وګړي، 23 فیصده د امنیتي ځواکونو کسان وژل شوي، او په دغه موده کې په وژل شوو کسانو کې یوازې 20 فیصده توندلاري وسله وال وو.

د څیړنو او امنیتي مطالعاتو د مرکز څیړونکي محمد نفیس د وي او اې ډیوه خبریالې رابعه پیر ته د وسله والو پېښو د زیاتوالي د اسبابو په اړه ویلي چې شاوخوا 40 نورې ډلې د تحریک طالبان پاکستان سره شاملې شوې دي چې د ټې ټې پې اثر یې زیات کړی دی او وایي د دې ترڅنګ نورې ترهګرې ډلې هم مخې ته راغلي.

نوموړی وایي داسې ښکاري چې دغه ډلې د تحریک طالبان پاکستان سره په ګډه عملیات کوي