د پاکستان په پخواني وزيراعظم او تحریک انصاف ګوند په مشر عمران خان او بهرنيو چارو پخواني وزیر شاه محمود قرېشي باندې د سايفر قضیه کې فرد جرم لګول شوی دی.
د پاکستان تحریک انصاف ګوند وکیل نديم احمد پنجوته ويلي، نن فرد جرم لګول شوی څنګه چې د توشه خانې قضيه چلېده، داسې د سايفر قضيې اورېدنې هم کيږي.
نوموړي په اېکس [پخواني ټویټر] خپره کړې ويډيو کې ویلي، د عمران خان د ضمانت په خواست، د قضيې ختمولو په خواست او د دې اورېدنې ودرولو په خواست هم فېصله محفوظه ده.
د افيشل سيکرټ اېکټ لاندې د عمران خان او شاه محمود قرېشي پرضد فرد جرم نن د ګل/ دوشنبې په ورځ لګول شوی او هغو د صحت جرم نه انکار کړی دی.
د قضيې اورېدنه د ځانګړي عدالت جج محمد ذوالقرنېن په اډياله جېل کې دننه کړې ده. عمران خان او شاه محمود قرېشي په اډياله جېل کې بنديان دي.
د رپوټونو ترمخه عدالت په قضيه کې د بلې اورېدنې او ګواهانو دپاره بله د اکتوبر 27مه نېټه ورکړې ده.
د مرکزي تحقيقاتي ادارې [اېف آی اې] وکیل شاه خاور ويلي، د سايفر قضيه کې د فرد جرم لګولو په وخت عمران خان او شاه محمود قرېشي په عدالت کې موجود وو.
د عمران خان وکیل عثمان رياض د فرد جرم لګول کېدو وروسته مطبوعاتو سره خبرو کې ويلي، عدالت ته یې خواست کړی وو چې د ګواهانو د بيانونو، بهرنی مېمو نه ترلاسه کېدو پورې فرد جرم نه لګوي خو عدالت یې اعتراضونه رد کړي او فرد جرم یې ولګولو.
د عمران خان يو بل وکيل عمېر نيازي ويلي، فرد جرم به په هايکورټ کې چېلنج کوي.
عمران خان تېر کال د اپرېل په مياشت کې د بې باورۍ د تحریک د لارې د وزيراعظمۍ څخه لرې کړی شوی، هغه وخت یې تور لګولی وو چې "د هغه حکومت د امريکې په سازش" لرې کړی شوی وو.
امريکې، د پاکستان پوځ او د پاکستان موجوده حکومت د عمران خان دغه تور څو ځله رد کړی چې ګنې هغه د امریکې په سازش لرې کړی شوی وو.
عمران خان د سایفر د لارې د امریکايي سازش د لومړي بيان وروسته په يو بل بيان کې ويلي وو سازش په اصل کې د دلته [پاکستان] نه شوی وو.
د تېرې جولايۍ په میاشت کې د عمران خان د پخواني پرنسپل سيکرټري اعظم خان د سايفر په حواله یو مبينه بيان په مطبوعاتو خپور شوی وو.
هغه ويلي وو، "عمران خان د سیاسي ګټو دپاره د سايفر يا بهرنۍ مراسلې ډرامه جوړه کړې او د سايفر د لارې یې د قامي امنيتي ادارو او ولس ترمنځه د کرکې خورولوهڅه کړې ده".
د شهباز شریف په وزيراعظمۍ د پاکستان تېر اتحادي حکومت د سايفر قضيې پلټنې پېل کړې وې.
د سايفر قضيه د عمران خان، شاه محمود قرېشي او اسدعمر پرضد جوړه شوې وه.
Forum