د خېبر پښتونخوا په کوهاټ سیمه کې د ټیک ټاک رسنۍ لپاره د ویډیو جوړولو شوق د دوؤ تنکیو ماشومانو ژوند اخستی دی.
پولیس سرچینې وایي تېره ورځ د کوهاټ په ګمګهول سیمه کې یو ۱۳ کلن ماشوم عمران علي د کور دننه ټیک ټاک رسنۍ لپاره ویډيو جوړوله چې پر دغه مهال ترې تمانچه خلاصه شوې اؤ خپل بل ۱۱کلن ورور عدنان یې وژلی دی.
د پولیس سرچینو وینا ده چې دخپل ورور له وژلو وروسته یاد ماشوم ویرې اخستی اؤ ځان یې هم په همغه تمانچه وژلی دی.
پولیس وایي په پېښه کې د وژل شوؤ دواړو ماشومانو تعلق د پنجاب خانیوال سیمې سره دی اؤ دا مهال په کوهاټ کې اوسیږي.
د وژل شوؤ ماشومانو پلار محمد نواز پولیسو ته ویلي چې د هغه د زوي عمران علي نه په ناپوهۍ کې ګولۍ چلېدلې ده اؤ خپل ورور یې وژلی دی.
محمد نواز زیاته کړې ده چې کله د هغه د زوي عمران علي نه خپل کشر ورور لګیدلی نو له هغې وروسته هغه هم ویرې اخستی چې ګنې د کور خلکو ته به اوس څه جواب ورکوي اؤ وایي هم ددغه ویرې له امله خپل ځان هم په هغه تمانچه وژلی دی.
د پولیسو لخوا د پېښې په اړوند درج ایف آی ار د کوهاټ د ضلعي پولیس افسر ددفتر څخه وي او ای ډیوه ته ترلاسه شوی چې هغې کې د ټیک ټاک رسنۍ لپاره د ویډیو جورولو هیڅ ذکر نشته.
خو پولیس سرچینو بیا ډیوه ته ویلي چې د چم ګاوند د خلکو نه ورته معلومه شوې ده چې په پېښه کې وژل شوؤ دواړو ماشومانو د تمانچې سره ټیک ټاک لپاره ویډيو جوړوله چې تمانچه ترې خلاصه شوې ده
Forum