د ابادۍ، کډوالو او ایمیګرېشن په چارو کې د امریکې د بهرنیو چارو د وزارت مرستیاله جولیټا والس نویز د دوشنبې- ګل په ورځ په څلور ورځني سفر اسلام اباد ته ځي.
د مېرمن والس نویز د سفر مقصد د هغو افغانانو په اړه له پاکستاني چارواکو سره خبرې کول دي چې د طالبانو له واکمنۍ وروسته امریکې ته د راتګ په انتظار په دې هېواد کې اوسېږي.
د امریکې د بهرنیو چارو وزارت د دسمبر په لومړۍ نېټه په یوه لنډ بیان کې ویلي، چې مېرمن والس نویز به د دسمبر له څلورمې تر اوومې نېټې په پاکستان کې وي.
دا د بې اسنادو کډوالو د ایستلو تر پرېکړې وروسته پاکستان ته د امریکې د یو اعلی چارواکي لومړی سفر دی چې په اړه به یې په اسلام اباد کې له چارواکو سره خبرې کوي.
سټېټ ډیپارټمنټ په خپل بیان کې ویلي، "مرستیاله سیکرټري [د بهرنیو چارو وزیره] به په اسلام اباد کې د حکومت له اعلی چارواکو او همدارنګه د غیرسرکاري او نړیوالو ادارو له شریکانو سره خبرې کوي چې امریکې ته د راتګ په انتظار افغان کډوالو د خوندي او مناسب ایستلو لپاره ګډې هڅې وکړي".
جولیټا والس نویز خپله هم د شنبې- خالي په ورځ پر ایکس [مخکیني ټویټر] لیکلي، نن شپه دوبۍ ته روانېږي او هلته به د موسمي بدلون په اړه نړیواله غونډه کې د ابادۍ، کډوالو او ایمیګرېشن لپاره د خپلې ادارې استازیتوب کوي. مېرمن نویز لیکلي:
"بیا به اسلام اباد ته ځم چې له اعلی حکومتي چارواکو او د بشردوستانه چارو له شریکو سره هلته له زیان سره مخ افغان کډوالو په اړه پر خپلو ژمنو خبرې وکړم".
نیزدې 25000 هغه افغانان چې په 2021م کال کې د طالبانو تر واکمنۍ مخکې یې په افغانستان کې د امریکا او نړیوالو پروګرامونو لپاره کار کړی وو امریکا ته د تګ اسناد یې جمع کړي وو، اوس په پاکستان کې امریکې ته د راتګ په انتظار دي.
هغه افغانان چې د امریکا کونسلي چارو ته اړتیا لري باید یو دریم هېواد ته سفر وکړي، لکه پاکستان ځکه په کابل کې د امریکا سفارت لا تړلی دی او واشنګټن دا رد کړې چې په ډیپلوماټیک ډول د طالبانو رژیم په رسمیت وپېژني.
د امریکا د بهرنیو چارو وزارت دا اونۍ د هغو افغانانو لپاره د مرستې یوه بېړنۍ شمېره یا هاټ لاین اعلان کړ کوم چې امریکا ته د راتګ په تمه دي خو د پاکستان لخوا د شړل کېدو او یا نیول کېدو له ګواښ سره مخ دي.
د بهرنیو چارو وزارت دې پوښتنو ته ځواب نه دی ویلی چې دا هاټ لاین به څه ډول خدمات ترسره کوي خو دغه هاټ لاین شمېرې ته د واټس اپ له لیارې له استونکو کسانو څخه په اتومات ډول د شخصي پېژندنې، نېټې او د نیول شویو کسانو د ځای په اړه پوښتنه کېږي چې چېرې نیول شوي دي.
د هاټ لاین په یو ځواب کې لیکل شوي، "مسېجونو ته به د رسېدو په ترتیب سره ځواب ویل کېږي."
د بشری حقونو ډلو له امریکا او نورو لویدیځو هېوادونو غوښتي چې له پاکستان څخه دې د افغان کډوالو د اسنادو د پراسس کولو چارې ګړندۍ کړي چې بېرته افغانستان ته له استولو او شکنجه کولو څخه بچ پاتې شي.
Forum