د پاکستان سپريم کورټ د سایفر قضيه کې د پخواني وزيراعظم عمران خان او پخواني بهرنيو چارو وزير شاه محمود قرېشي ضمانت منظور کړی دی.
د رپورټونو ترمخه، د سپريم کورټ قايم مقام چیف جسټس سردار طارق مسعود په مشرۍ د درېو ججانو بنچ د عمران خان او شاه محمود قرېشي په خواستونو اورېدنه کړې، او د لسو لسو لکو روپو د مچلکو په عوض یې د هغو ضمانتونه منظور کړي دي.
عدالت د پراسيکیوشن د دلايلو اورېدو وروسته ویلي، کوم اسناد چې وړاندې کړی شوي په هغې کې په هیڅ ډول قضيه نه ثابتيږي.
په 13م دسمبر د سايفر قضيه کې د عمران خان او د هغه د حکومت د پخواني وزير شاه محمود قرېشي باندې فرد جرم لګول شوی او دواړو د صحت جرم نه انکار کړی وو.
په عمران خان تور دی چې اووم مارچ 2022م یې د امریکې څخه ترلاسه کړی سایفر د خپلو شخصي ګټو دپاره کارولی او د ملي امنیت خیال یې نه وو ساتلی.
د ياد تور په اساس د روان کال 2023م د اګست په 15مه مرکزي تحقيقاتي ادارې (اېف آی اې) د عمران خان ضد د ملک د پټو رازونو ښکاره کولو قانون (افيشل سيکرټ اېکټ) په سرغړونه کولو مقدمه درج کړې وه.
په 29م اګست د سایفر قضيې اورېدنې دپاره جوړ ځانګړي عدالت جج په 29م اګست په عمران خان فرد جرم لګولی وو. خو اسلام اباد هايکورټ په جېل کې د دغه قضيې اورېدنه کالعدم ګرځولې وه.
عمران خان او شاه محمود قرېشي په یاده قضيه کې اسلام اباد هايکورټ ته د ضمانت خواستونه کړي خو اسلام اباد هايکورټ رد کړي او دوی بيا سپريم کورټ ته تللي وو.
پرون د زيارت/ پنجشنبې په ورځ د اسلام اباد هایکورټ د توشه خانې قضيه کې عمران خان ته د اورل شوې سزا د فېصلې معطل کولو خواست رد کړی دی. د ځايي رپورټونو ترمخه د عمران خان نااهلي په ځای پاتې شوې ده.
په پينځم اګست د اسلام اباد سيشن عدالت جج همايون دلاور عمران خان ته د توشه خانې قضيه کې د درېو کالو بند سزا اورولې او بندي کړی شوی وو، او بيا په 29م اګست اسلام اباد هایکورټ دغه سزا معطل کړې خو عمران خان هايکورټ ته د سيشن کورټ د فېصلې معطل کولو خواست کړی وو.
عمران خان ته د سزا اورول کېدو وروسته د پاکستان الېکشن کمېشن دی د پينځو کالو دپاره نااهله کړی وو.
له دغې وړاندې په نهمه مې عمران خان د القادر ټرسټ په قضيه کې نيول شوی خو په 11مه مې بيا سپريم کورټ د هغه نيول غېر قانونه ګرځولي او د هغه په فوري توګه خوشي کولو حکم یې کړی وو.
Forum