خېبر پښتونخوا او بلوچستان کې د وسله والو بریدونو کې پولیسو ته مرګ ژوبله اوښتې

د پاکستان په خېبر پښتونخوا اؤ بلوچستان صوبو کې نامعلومو وسله والو په پولیسو بریدونه کړي چې پکې یو پولیس عسکر وژل شوی اؤ د دوؤ نورو عسکرو په ګډون څلور تنان ژوبل شوي دي.

امنیتي سرچینو وي او ای ډیوه ته ویلي د نهې - سه شنبې په ورځ د خېبر پښتونخوا د کرک ضلعې په تخت نصرتي سیمه کې په جهانګیري روډ نامعلومو وسله والو د پولیسو یو عسکر په هدفي توګه وژلی دی.

سرچینې وایي د وژل شوي پولیس عسکر پېژندګلو د رؤف په نامه شوې ده چې د تخت نصرتي سیمې اوسیدونکی ؤ اؤ د خپلې دندې څخه یې د دوؤ اوونیو رخصتي اخستې وه.

ددې پېښې ذمه واري په سمدستي توګه چا نه ده قبوله کړې اؤ د سیمې پولیس وایي د پېښې ایف آی ار یې د نامعلومه وسله والو پرضد درج کړی اؤ پلټنې یې پیل کړې دي.

په عین حال کې د پښتونخوا د بنو ضلعې په جاني خیل سیمه کې د پولیسو په یوه پوسته نامعلومو وسله والو برید کړی خو پولیس وایي چې په برید کې ورته څه ځاني زیان نه دی رسیدلی.

د پولیس سرچینو وي او ای ډیوه ته ویلي جاني خیل سیمه کې د ترکاڼانو په پوسته پولیس ډیوټۍ ته ولاړ وؤ چې نامعلومو کسانو پرې ډزې وکړې اؤ وتښتېدل.

د پولیسو وینا ده چې له برید وروسته په سیمه کې د لټونې عملیات پېل کړل شوي خو لا ددې پېښې په تړاؤ څوک نه دي نیول شوي.

تر دې پېښې وړاندې د اتوار په شپه هم د لکي مروت په ګمبیلا پولیس اسټیشن نامعلومو وسله والو برید کړی ؤ خو پولیسو دعوه کړې وه چې په ځوابي ډزو یې د وسله والو برید پشا تمبولی اؤ پولیسو ته په دغه برید کې هیڅ زیان نه دی رسیدلی.

په خېبر پښتونخوا کې په پولیسو د شوؤ دې پرله پسې بریدونو په څېر تېره ورځ د بلوچستان ایالت سرښار کوټه کې هم په پولیسو وسله والو ډزې کړي دي چې پکې د دوو پولیس عسکرو په ګډون څلور کسان ژوبل شوي دي.

د کوټې پولیس سرچینو ډیوه ته ویلي دغه پېښه د کوټې سره نزدې په نوي کلي د نهې یا سه شنبې په ورځ مخې ته راغلې ده.

سرچینې وایي نامعلومو وسله والو دغلته په ګزمه د بوختو پولیسو په ګاډي ډزې کړي چې پکې دوه پولیس اؤ دوه نور عام کسان ژوبل شوي دي.

سرچینې وایي له برید وروسته وسله وال له سېمې تښتېدلي اؤ پولیسو د هغوي د نیولو لپاره په سیمه کې د لټونې عملیات پېل کړي دي.

په دې وروستیو کې په خېبر پښتونخوا اؤ بلوچستان ایالت کې د ترهګرۍ پېښې یو وارې بیا چټک شوي اؤ په دې دواړو صوبو کې د وسله والو لخوا شوؤ بریدونو کې د سوؤنو امنیتي سرتېرو ترڅنګ په سلګونو عام خلک هم وژل شوي اؤ ژوبل شوي دي.

پاکستان کې په امنیتي ځواکونو د ترسره شوؤ زیاتره بریدونو پړه وسله والو ډلو تحریک طالبان پاکستان،داعش اؤ بلوڅ بیلتون خوښو وسله والو په غاړه اخستې ده.