اسرایلي پوځ په غزه کې د عملیاتو د نوي پړاو د پیل اشاره ورکړې ده

اسرایل د ګل/دوشنبې په ورځ اعلان وکړ چې په غزه پټۍ کې به خپل د عسکرو تعداد راکموي، خو هلته کې به د حماس په ضد هدفي عملیات سېوا کوي. دا اشاره څرګندوي چې اسرایل په غزه کې خپل عملیات نوي پړاو ته اړوي.

د اسرایل د دفاعي ځواکونو په یو جاري کړی شوي بیان کې راغلي چې د غزې نه د یو شمېر عسکرو بېرته اېستل به هم "اقتصادي بوج ډېر زیات راکم کړي" او عسکرو به هم دمه ورکړي چې "په آینده کال کې د راتلونکو فعالیتونو دپاره خپل قوت راتازه کړي، ځکه جګړه به دوام پیدا کړي او بیا به هم عسکرو ته ضرورت وي."

د اسرایل د قواوو ترجمان ډانیل هاګاري وویل چې توقع ده جنګ دوام پیدا کړي. هغه د اتوار/یکشنبې په ورځ وویل چې د جنګ د مقاصدو حاصلول، "اوږدمهاله جګړې ته ضرورت لري."

د غزې اوسېدونکي وایي چې اسرایل د هغې پټۍ د ځینو علاقو نه خپل ټېنکونه اېستلي دي. د اسرایل دفاع وزیر یوواو ګېلنټ د ګل/دوشنبې په ورځ یو خبري کنفرنس ته وویل، ځیني اسرایلي ټولنې چې د غزې په شمال پلو ته دېره و خو د حماس ډلې د اکټوبر ۷مې نېټې د حملو نه پس یې خپل کورونه پرېښودلي و، هغوی به ژر تر ژره وکړی شي چې بېرته خپلو کورونو ته ستانه شي.

په همدې حال کې د امریکا سمندري ځواکونو اعلان کړی چې د دوی یو اېس اېس جېرالډ فورډ طیاره برداره جهاز چې د اکټوبر ۷مې نېټې د تشدد نه پس د بحیره روم ختیځ ته لېږل شوی و، اوس بېرته د امریکې وېرجېنیا ریاست بندر ته راستنیږي.

اسرایل د خپل نږدې اتحادي ملګري، امریکا لخوا د فشار لاندې دی چې باید په غزه کې د اولسي فلسطینیانو د ژوند خیال وساتي او هلته کې خپل د عملیاتو شدت راکم کړي.

د جګړې دوام

په پوځي عملیاتو کې د اسرایل د تګلارې بدلېدو باوجود هم په غزه پټۍ کې سخته جګړه روانه ده. حماس ډلې د ګل/دوشنبې په ورځ د ګڼ شمېر راکټونو حملې وکړې، چې سمدستي په ټول اسرایل کې د بمباریو د خبرداري زنګونه ووهل شول.

د حماس د دې راکټي بریدونو په نتیجه کې د کومې مرګ ژوبلې رپوټ ندی ورکړی شوی. حماس وخت ناوخت په اسرایل باندې دغسې راکټي بریدونه کړي دي. اسرایل اوس ژمنه کړې چې حماس به ختموي.

د تازه راکټي حملو نه پس، غزه کې د اسرایل هوایي بمباریو هم زور واخېست. د اسرایل دفاعي ځواکونو وویل چې په یوه فضایي حمله کې، ګني د حماس یو کمانډر چې د اکټوبر په ۷مه نېټه د اسرایل په جنوب کې د ترهګرو حملو مشري یې کوله، هم وژل شوی دی.

اسرایلي ځواکونو دا کمانډر عادل مسماح بللی، او ویلي یې دي چې په غزه باندې د اسرایل د حملې نه پس هم دغه کمانډر د حماس ډلې د جنګیالیو په مشرۍ کې مرسته کوله.

اسرایلي پوځ د ګل/دوشنبې په ورځ دا هم وویل چې عسکرو او هوایي جهازونو یې "په لبنان کې یو لړ اهدافو باندې حملې کړي چې په دې کې د ترهګرو تنصیبات، ځیني پوځي مرکزونه چې د حزب الله ترهګرو د هغه ځایه فعالیت کولو، او د راکټ داغلو ځایونه شامل دي."

اسرایل خبرداری ورکړی چې که حزب الله د حملو نه ډډه ونکړي، نو امکان شته چې اسرایل په ټول لبنان حمله وکړي.