بلېنکن په منځني ختيځ کې دی او د جګړې د خورېدو وېره زیاته شوې ده

د امریکا خارجه وزیر انټني بلېنکن منځني ختيځ ته د خپلې تازه دورې په لړ کې، نن د اتوار/یکشنبې په ورځ اردن ته ولاړ او هلته یې د اردن له پاچا، ملک عبدالله-دویم او له خارجه وزیر ایمن الصفدي سره وکتل. بلېنکن همدا شان د خوراک د عالمي پروګرام (ډبلیو اېف پي) یو ګودام ته هم ورغی، چېرته چې د غزې دپاره هلته نه خوراکي مرستې په ټرکونو کې باریږي.

د منځني ختیځ د خطې په دوره کې، اردن د بلېنکن د سفر آخري منزل و. له هغه وخته چې اکټوبر میاشت کې د اسرایل او حماس ترمنځ جنګ پیل شو، اردن او نور عرب ملکونو د فوري ډزبندۍ غوښتنه کړې ده، مګر اسرایل دا غوښتنه تر اوسه نده منلې.

د امریکا خارجه وزیر د ترکیې د صدر رجب طیب اردوان سره د خبرو وروستو، د خالي/شنبې ورځې ناوخته خبریالانو ته وویل چې ترکیه آماده ده چې د جنګ د کمولو او نورو سیمو ته د غزې د جګړې خورېدو د مخنیوي دپاره خپل اثر رسوخ استعمال کړي. طیب اردوان په غزه کې د اسرایلي پوځ د کاروایۍ یو کلک ناقد دی.

د بلېنکن سره په یو جدا ملاقات کې د ترکیې خارجه وزیر خاقان فېدان په غزه کې "یوه فوري ډزبندي" وغوښته چې د هغه ځای خلکو ته بشري امداد په آسانۍ سره ورسول شي. د ترکیې د سفارتکاري ذرائعو مطابق، هغه همدا راز د دوه-ریاسته حل لارې په سر د مذاکراتو د فوري پیل کېدو غوښتنه وکړه.

امریکا د اسرایلیانو او فلسطینیانو، دواړو دپاره په یو پایداره امن و امان ټینګار کړی، او دا یې ویلي چې غواړي فلسطینیان ځان ته سیاسي حقونه حاصل کړي، په خاص ډول د یو فلسطیني ریاست جوړېدل چې د اسرایل دپاره امن هم په کې تضمین شوی وي.

په شمالي غزه کې د حماس د "پوځي اډانې ماتېدل"

د اسرایل د پوځ یو ترجمان د خالي/شنبې په ورځ دعوه وکړه چې د هغو ځواکونو د غزې په شمالي علاقو کې د حماس ډلې "پوځي اډانه" ورماته کړې، او هلته یې شاوخوا اته زره (۸۰۰۰) تندلاري وژلي او په لسهاوو زره وسلې او میلینونه دستاوېزات یې قبضه کړي دي.

د اسرایل د پوځ ویاند ډانیل هاګاري په یو آنلاین بیان کې وویل چې اسرایل اوس د غزې پټۍ په مرکزي او جنوبي سیمو کې د حماس ډلې ماتولو ته توجو کوي، او دا یې هم یاده کړه چې دا کار به وخت اخلي.

هاګاري زیاته کړه چې په مرکزي او جنوبي غزه کې به د حماس ډلې له منځه وړلو طریقه فرق ولري، او هغسې به نه وي لکه په شمالي غزې کې چې وه. هغه دا یادونه وکړه چې "په مرکزي غزه کې د کډوالو کېمپونو کې ګڼه ګوڼه ډېره ده او د ترهګرو نه ډک دي."

د اسرایل د پوځ ویاند دا هم وویل چې د غزې په جنوب کې ډېر زیات او پيچلي سرنګونه یا سمڅې شته چې تباه کول به یې ډېر کار غواړي.

د اسرایل وزیراعظم بنیامین نېتنیاهو د خالي/شنبې په ورځ یو بیان کې وویل چې د حماس خلاف جنګ باید تر هغو جاري پاته شي چې اسرایل خپل درې اصلي مقصدونو ته نه وي رسېدلي او هغه "د حماس له منځه وړل، زمونږ د یرغمل تنانو راستنول، او دا یقیني کول دي چې غزه به نور اسرایل ته څه خطره نه وي."