د امریکې پوځ وايي حوثي یاغیانو د یمن ساحل ته نیژدې د عدن په خلج کې د یوې امریکايي کمپنۍ په باروړونکې بېړۍ باندې د میزایل حمله کړې ده. حوثي یاغیانو د برید ذمه واري منلې ده او دې برید ټول منځني ختیځ ته د شخړې د خپرېدو اندېښنه زیاته کړې ده.
په منځني ختیځ کې د امریکې د پوځ مرکزي کمانډ سېنټکام وايي، پر دې بېړۍ د مارشل ټاپوګانو بیرغ رپېده او د میزایل د لګېدو په نتیجه کې اور پرې لګېدلی خو وایي مرګ ژوبله یې نه ده اړولې او خپل سفر ته دوام ورکوي.
سېنټکام د دوشنبې- ګل په ورځ پر خپله ایکس پاڼه لیکلي چې ایران پلوو حوثي وسلوالو دا بېړۍ په یمن کې تر خپلې ولکې لاندې سیمو څخه د کښتیو ضد یو بېلسټیک میزایل په وسیله په نخښه کړې ده.
حوثي یاغیانو تر اوسه په دې اړه کومه اعلامیه نه ده خپره کړې خو پوځي څانګې یې او د یمن د حکومت یوې سرچینې فرانس پریس خبري ایجنسۍ ته ویلي پرون دې ډلې درې میزایل ویشتلي دي.
د حوثیانو د پوځ ویاند بریګېډیر جنرل یحیی سري د دوشنبې- ګل په شپه په یوه ټیلیویژني وینا کې د برید ذمه واري منلې ده. هغه ویلي:
"د یمن وسلوال ځواکونه د امریکې او برتانیې هغه ټولې سمندري او جنګي بېړۍ د دښمنانو هدفونه ګڼي چې زموږ پر هېواد باندې په یرغل کې برخه اخلي".
د امبرې په نوم د برتانیې د سمندري تجارت د امنیت ادارې له تفصیل ورکولو پرته ویلي، "بیړۍ له پورته په میزایل ویشتل شوې ده" او وایي دا برید په یمن کې د حوثيانو پر پوځي هدفونو د امریکا د بریدونو په جواب کې د امریکا ګټې په نښه کوي"، خو دا بېړۍ "په اسرائیل پورې تړلې نه ده."
تر دې یوه ورځ وړاندې د امریکا پوځ ویلي وو چې ځواکونو یې په سر سمندر کې پر خپله یوه ستره جنګي بیړۍ باندې د حوثي یاغیانو ور ویشتل شوی کروز میزایل شنډ کړی دی.
له څو اوونۍ په سره سمندر کې د حوثیانو د بریدونو په غبرګون کې د تېرې جمعې په ورځ امریکا او برتانیا د یمن په هغو څو سیمو کې هوايي حملې وکړې چې د یاغیانو تر ولکې لاندې دي.
د حوثیانو میزایلي حملو او پر یمن د امریکې او برتانیې بمبارۍ دا ویره پیدا کړې ده چې په غزه کې روانه جګړه ټولې سیمې ته خوره شي، ځکه چې حوثي یاغیان وايي په سره سمندر کې د دوی د حملو هدف د غزې له خلکو سره خواخوږي ده.
د نړۍ د تجارتي بېړیو شاوخوا 12 فیصده د یمن او جیبوټي تر منځ په سره سمندر له پراته تنګي تېرېږي او وروستیو حملو د دغو بېړیو تګ راتګ اغېزمن کړی دی.
امریکا تېره میاشت یو امنیتي پلان اعلان کړ چې هدف یې د سره سمندر په دې برخه کې د کښتیو د تګ راتګ امنیت ټینګول بلل شوي دي.
یادونه:- د رپوټ ځینې معلومات له اې ایف پي او اې پي خبري ایجنسیو اخیستل شوي دي.
Forum